Венгрия Усмонов ва унинг синглисини ЕИ санкцияларидан чиқармоқчи

Расмий Будапешт саккиз нафар россиялик Европа Иттифоқининг санкциялар рўйхатидан чиқарилмаса, Россияга қарши Европа санкцияларини узайтиришга вето қўйишга тайёрлигини маълум қилди. Бу ҳақда “Reuters” хабар берди.

north_east

Буюк Британия Алишер Усмонов компанияси ва Каримовлар оиласига санкция киритди

Айтилган ушбу шахслар:

Алишер Усмонов – Россиянинг энг бой бизнесменларидан бири. 2022 йил 28 февралдан Европа Иттифоқи санкцияларига учраган, у “Кремлга содиқ олигарх” ва “Владимир Путиннинг севимли олигархи” сифатида тасвирланган, шунингдек, “Путин учун бизнес масалаларини ҳал қилган” шахс сифатида танилган.

Гулбаҳор Исмоилова – Усмоновнинг синглиси, тахминан унинг хориждаги активларининг бир қисмига эгалик қилган, бу эса санкциялар учун асос бўлган. 2022 йил 8 апрелда Европа Иттифоқи санкцияларига тушган.

Михаил Фридман – Alfa-Bank ҳаммуассиси ва йирик инвестор, унинг молия гуруҳи Европа Иттифоқи мамлакатларида фаолият юритган. Фридман ва унинг шериги Пётр Авенга Европа Иттифоқи санкциялари 2022 йил 28 февралда жорий этилган.

north_east

Германияда Алишер Усмонов яшаган вилла сотувга қўйилди

Пётр Авен – Alfa-Bank'нинг яна бир ҳаммуассиси. У учун ҳам Европа Иттифоқи санкциялари Фридман билан бир вақтда жорий этилган.

Дмитрий Мазепин – “Уралхим” ҳолдинги ҳамсоҳиби, 2022 йил 24 февралда Россиянинг Украинага кенг кўламли ҳужуми вақтида Путин билан учрашган катта бизнесменлар орасида бўлган. Европа Иттифоқи санкцияларига 2022 йилнинг март ойида тушган.

Вячеслав Моше Кантор – бизнесмен. Европа Иттифоқи санкциялари 2022 йил 8 апрелда жорий этилган, у “Россиянинг олигархи” ва “Владимир Путин билан яқин алоқалар” ўрнатган шахс сифатида таърифланган.

Муса Бажаев – Alliance гуруҳи раҳбари ва нефть магнати. 2022 йилнинг апрелидан санкцияга тушган. Европа Иттифоқи унинг бизнеслари орқали Россия иқтисодиётининг стратегик тармоқларини қўллаб-қувватлашини ҳисоблайди.

Михаил Дегтярёв – Россия Спорт вазири. У 2014 йил 25 июлдан Европа Иттифоқи санкцияларига тушган, чунки Дума депутати бўлганида ДНР деб номланган ҳудудий тузилманинг Москвадаги “элчихонасини” очганини эълон қилган.

Европа Иттифоқининг санкция рўйхати мунтазам равишда кўриб чиқилади ва 27 та аъзо мамлакатнинг бир овоздан қўллаб-қувватлаши билан узайтирилади. Венгрия аввал ҳам вето ҳуқуқидан фойдаланиш билан таҳдид қилган эди.

Венгрия Бош вазири Виктор Орбан санкциялар Россиядан кўра Европа Иттифоқи мамлакатларига кўпроқ таъсир ўтказаётганини айтган. Брюссель эса санкциялар бўйича ягона чизиқ бўлмаса, Европа Иттифоқи Москвага босим ўтказишнинг асосий воситасини йўқотишини таъкидлаган.

Маълумот учун, Алишер Усмонов АҚШ, Европа Иттифоқи, Буюк Британия, Швейцария, Канада, Япония, Австралия ва Янги Зеландиянинг “қора рўйхати”га киритилган. Миллиардерга нисбатан чекловлар Россия-Украина уруши бошланганидан сўнг киритилган.

Эслатиб ўтамиз, аввалроқ Германиянинг Гамбург ер суди “Tagesspiegel” газетасига тадбиркор Алишер Усмонов ҳақида ёлғон даъволарни тарқатишини тақиқлагани ҳақида хабар берилганди.