Van Damm odam savdosida ayblanmoqda

Ruminiyada aktyor Jan-Klod Van Damm odam savdosi tarmog‘ida, jumladan, voyaga yetmaganlar savdosiga ishtirok etganlikda ayblandi. Bu haqda “Libertatea” xabar berdi.

Ma’lum qilinishicha, tergovni Ruminiya uyushgan jinoyatchilikka qarshi kurashish prokuraturasi olib bormoqda. Ish 26 yoshli mamlakat fuqarosining arizasiga ko‘ra ochilgan, u o‘n yil oldin Fransiyaning Kann shahrida aktyor tomonidan ekspluatatsiya qilinganini da’vo qilmoqda.

Yigit bayonotda u yolg‘iz emasligini, boshqa bir guruh qizlarni ham “aktyorga berishganini” va voqea joyida bo‘lganlar bu haqda bilishganini aytgan.

Jabrlanuvchining advokati Adrian Kukulisning aytishicha, artist o‘n yil avval Fransiyada bo‘lgan vaqtida kelib chiqishi ruminiyalik bo‘lgan besh nafar qizning jinsiy xizmatidan foydalangan. Huquqshunosning so‘zlariga ko‘ra, Van Dammga qarshi jinoiy ish uchta band bo‘yicha ochilgan:

• Ruminiya Jinoyat Kodeksining 182-moddasi (ekspluatatsiya qilinayotgan shaxs xizmatlaridan foydalanish)
• 367-moddasi (jinoiy uyushma tashkil etish)
• 210-moddasi (odam savdosi)

“Hotnews” portali ma’lumotlariga ko‘ra, aktyor uchun qizlarni ruminiyalik tadbirkor va modellik agentligi egasi Morel Bolya tanlagan. 2022 yilda u voyaga yetmaganlar savdosida ayblangan. Tergov ma’lumotlariga ko‘ra, tadbirkor o‘zining modellik agentligi orqali qizlarni “ruhiy zo‘ravonlik bilan jinsiy ekspluatatsiya qilish” faoliyatiga jalb qilgan.

Nashrning eslatishicha, bu belgiyalik aktyorning jinsiy zo‘ravonlikda ayblangan birinchi holati emas. 2022 yilda Belgiya prokuraturasi 2021 yil avgust oyida Bryussel barida sodir bo‘lgan voqea haqidagi shikoyatdan so‘ng unga qarshi tergov boshlagan. O‘shanda 33 yoshli ayol aktyor unga jinsiy aloqa qilishni taklif qilib, hujum qilmoqchi bo‘lganini aytgan. Politsiya ish qo‘zg‘atgan, Jan-Klod Van Damm ayblovlarni rad etgan.

Ma’lumot uchun, Jan-Klod Van Damm 80-90 yillarda jangari filmlardagi rollari bilan tanilgan. U Belgiyada o‘rta sinf oilasida tug‘ilgan. Yoshligida Jan-Klod karate bo‘yicha Yevropa chempioni bo‘ldi va jang san’atining boshqa ko‘plab turlarini zabt etgan, bu esa unga kino olamiga eshiklarni ochgan. U “Qonli sport” va “Universal askar” kabi filmlarning yulduziga aylangan.

Aktyorning shaxsiy hayoti, ayniqsa, uning ko‘plab nikohlari ham ma’lum. “Starhit” nashrining yozishicha, Jan-Klod besh marta uylangan.