Ваҳший қотиллик: Фарғонада ака-ука уй учун ота-онасини ўлдирди

Фарғона шаҳрида ака-ука уй учун ўз онаси ва ўгай отасини ўлдирди. Улардан бири 13 йилга, яна бири эса умрбод қамалди. Бу ҳақда “Миллар” дастурида хабар берилди.

Қайд этилишича, ака-ука Фарғона шаҳридаги уйга эгалик қилиш мақсадида ўзларининг онаси ва ўгай отаси ҳамда укасини ўлдиришни режа қилган. 27 ёшли ака 2009 йилда туғилган укаси билан бирга онасининг Фарғона шаҳридаги уйига борган ва улардан бири болалар хонасига яшириниб олган. Бошқаси эса ўгай отасини ташқарига олиб чиқиб кетган. Шу пайтда судланувчилардан бири онасига ҳужум қилган. Уни қўллари ва электр кабели билан бўғган ҳамда бошига шиша идиш билан уриб, ўлдирган. Шундан сўнг, у SMS орқали укасига хабар юбориб, ўгай отасини ҳам уйга чақирган. Улар уйга келганда ювиниш хонасида яшириниб ўтирган ўғил ошхона пичоғи билан чиқиб, ўгай отасига 12 марта зарба берган.

Шундан сўнг, ака-ука мурдаларни ётоқ диванининг ичига жойлаган ва ўгай укасини ҳам ўлдиришни режа қилган. Ўгай укаси уйга қайтганда улар ўз режасини амалга ошира олмаган. Ука қаттиқ қаршилик қилиб, қочишга эришган. Шундан кейин ака-ука уйдаги пуллар ва қимматбаҳо буюмларни олиб, уйдан чиқиб кетган.

Мазкур ҳолат Жиноят ишлари бўйича Фарғона шаҳар судида кўриб чиқилган. Суд ҳукмига кўра, вояга етмаган судланувчига узил-кесил 13 йил муддатга озодликдан маҳрум қилиш жазоси тайинланган. Унинг акаси эса умрбод озодликдан маҳрум қилинган.

Эслатиб ўтамиз, аввалроқ Фарғона вилоятида 29 ёшли ўғил пул сабаб келиб чиққан жанжал ортидан онасини болта билан ўлдирганди.