Ўзбошимчалик билан қурилган уйларни расмийлаштиришнинг янги тартиби жорий этилади

north_east

Ўзбошимчалик билан эгалланган ер участкаларини расмийлаштириш учун қанча тўлов қилиш керак?

Ўзбекистонда фуқароларга қурилиш учун ажратилган ер участкаларида барпо этилган, шу жумладан, ўзбошимчалик билан қурилган уй ва иншоотларни расмийлаштириш ҳамда уларни ягона тартибда ҳисобга олиш бўйича янги механизм жорий этилиши мумкин. Бу ҳақда 2 декабрь куни иқтисодиёт ва молия вазирлиги томонидан жамоатчилик муҳокамасига қўйилган “Ажратилган (реализация қилинган) ер участкаларида қурилган бино ва иншоотларни тизимли ҳисобга олишни жорий этиш чора-тадбирлари тўғрисида”ги ҳукумат қарорида сўз боради.

Қайд этилишича, мазкур ҳужжат “Ўзбошимчалик билан эгаллаб олинган ер участкаларига, шунингдек, уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун ижросини таъминлаш мақсадида ишлаб чиқилган.

Қарор лойиҳасига кўра, қонун доирасида ташкил этилган ишчи гуруҳлар барча турдаги кўчмас мулкларни хатловдан ўтказади, бу жараён учун ер участкаси эгаларидан ариза талаб этилмайди. Ажратилган ёки реализация қилинган ер участкаларида ўзбошимчалик билан қурилган уй ва иншоотлар ҳақидаги маълумотлар “Эътироф” ахборот тизимига киритилади.

Кадастр агентлиги томонидан фойдаланишга рухсат берилган бино ва иншоотларга бўлган ҳуқуқлар белгиланган тартибда давлат рўйхатидан ўтказилади.

Шунингдек, хатлов жараёнида ўзбошимчалик қурилиш ҳолатлари аниқланса, фуқароларга уй ва иншоотларни қандай тартибда расмийлаштириш бўйича тушунтириш ишлари олиб борилади.

Хатлов ишлари тугаганидан кейин уч ой ичида қурилиш учун ажратилган ер майдонларидаги ўзбошимчалик билан барпо этилган уй-жойлар расмийлаштирилмаса, бу объектлар тўғрисидаги маълумотлар Кадастр агентлиги томонидан Солиқ қўмитасига, Қурилиш ва уй-жой-коммунал хўжалиги вазирлиги томонидан эса тегишли назорат инспекцияларига тақдим этилади.

Эслатиб ўтамиз, Вазирлар Маҳкамасининг жорий йилнинг 27 май куни қабул қилинган “Ўзбекистон Республикасининг “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонунини амалга ошириш бўйича қўшимча чора-тадбирлар ҳақида”ги қарори билан Ўзбекистонда объектларнинг мураккаблиги ва турига қараб уларнинг кадастр паспортларини тайёрлаш муддати узайтирилганди.