Ўзбекистоннинг ЖАРдаги биринчи элчиси тайинланди

Ўзбекистоннинг Жанубий Африка Республикасидаги биринчи Фавқулодда ва мухтор элчиси Ашраф Хўжаев кеча, 2 октябрь куни Претория шаҳрида жойлашган Сефако Макгато президент меҳмонхонасида Президент Сирил Рамафосага ишонч ёрлиқларини топширди. Бу ҳақда ЖАР Президенти маъмурияти хабар берди.

44 ёшли Ашраф Хўжаев Тошкент давлат шарқшунослик институти, Ўзбекистон Миллий университети, Пекин университетини тамомлаган. Иқтисодиёт фанлари номзоди (PhD) илмий даражасига эга.

У Ташқи ишлар вазирлиги тизимидаги фаолиятини 2005 йилда референт сифатида бошлаган. Ўтган йиллар давомда у вазирлик марказий аппаратида, шунингдек, Нью-Йорк шаҳридаги Ўзбекистоннинг БМТдаги доимий ваколатхонасида ва Буюк Британиядаги элчихонада турли лавозимларда ишлаган.

Ашраф Хўжаев 2018 йилдан эътиборан Ташқи ишлар вазирлигининг Иқтисодий дипломатия департаменти бошқарма, бош бошқарма бошлиғи ва директори бўлиб фаолият олиб борган. У 2024 йил февралда Ўзбекистоннинг Қатардаги биринчи элчиси этиб тайинланган.