Ўзбекистоннинг Босния ва Герцеговинага биринчи элчиси тайинланди

Ўзбекистоннинг Босния ва Герцеговинага тайинланган биринчи Фавқулодда ва мухтор элчиси Бахтиёр Иброҳимов ушбу давлат Президиуми раиси Желька Цвияновичга ишонч ёрлиғини топширди. Бу ҳақда “Дунё” ахборот агентлиги хабар берди.

Мулоқот чоғида Ўзбекистон ҳамда Босния ва Герцеговина ўртасидаги икки томонлама муносабатларни ривожлантириш истиқболлари муҳокама қилинди. Савдо-иқтисодий, маданий ва туризм соҳаларида ҳамкорликни мустаҳкамлаш масалаларига алоҳида эътибор қаратилди.

Босния ва Герцеговина етакчиси Желька Цвиянович Ўзбекистонда Президент Шавкат Мирзиёев раҳбарлигида амалга оширилаётган кенг кўламли ислоҳотлар ва уларнинг натижаларини юқори баҳолади.

Ҳар икки томон муносабатларни сифат жиҳатидан янги босқичига олиб чиқишга тайёр эканини тасдиқлади.

Маълумот учун, Бахтиёр Иброҳимов бунгача Ўзбекистоннинг Австрия, Албания ва Словакиядаги Фавқулодда ва мухтор элчиси сифатида аккредитация қилинган эди. Хусусан, дипломат 2023 йилнинг ноябрь ойида Австрия Президенти Александр Ван дер Белленга, 2025 йилнинг январь ойида Албания Президенти Байрам Бегайга ва шу йилнинг март ойида Словакия Президенти Петер Пеллегринига ўзининг ишонч ёрлиқларини топширган эди.

Шунингдек, Иброҳимов 2023 йилнинг октябрь ойида ЕХҲТ, UNODC, МАГАТЭ ва Ядро синовларини кенг қамровли тақиқлаш тўғрисидаги шартнома ташкилоти каби халқаро тузилмалар ва БМТнинг Вена шаҳридаги бошқа институтларида Ўзбекистоннинг расмий вакили сифатида ҳам аккредитациядан ўтган.

Эслатиб ўтамиз, аввалроқ Иван Орлич Босния ва Герцеговинанинг Ўзбекистондаги элчиси этиб тайинланганди.