Ўзбекистонликларга биржада криптовалюта сотиб олишга рухсат берилди. Шартлар қандай?

Жамият 6073
image

Лойиҳа бошқаруви миллий агентлиги Ўзбекистон резидентларига криптовалюта сотиб олиш ва сотишга рухсат берди. Бу ҳақда агентлик директорининг “Крипто-биржалар фаолиятини лицензиялаш тартиби тўғрисидаги низомнинг 1а-иловасига ўзгартириш ва қўшимчалар киритиш ҳақида”ги буйруғида белгиланган.

Ҳужжат билан биринчи марта 2019 йил 21 январда қабул қилинган криптобиржаларни лицензиялаш тартиби тўғрисидаги низомга ўзгартиришлар киритилди.

Эндиликда Ўзбекистон Республикасининг резидентлари крипто-биржаларда крипто-активлар ва токенлар билан крипто-биржа савдоларининг барча турларини миллий Валютада амалга ошириши мумкин.

Бироқ Ўзбекистон Республикасининг норезидентлари билан фақатгина крипто-активлар ва токенларни сотишга доир операцияларни хорижий валютада амалга ошириш ҳуқуқига эга.

Шунингдек, юридик шахсларнинг раҳбарлари, якка тартибдаги тадбиркорлар ҳамда уларнинг вакиллари крипто-биржада токенларни чиқариш ва жойлаштиришга қаратилган фаолиятни амалга оширадиган шахслар тоифасига кириш ёки кирмаслигини текшириши мумкин.

Ўзбекистон крипто-биржаларида сотиладиган барча токенлар мулкий таъминотга эга бўлиши керак. Мулкий таъминотга эга бўлмаган токенларни чиқариш ва жойлаштириш тақиқланади.

Криптобиржалар ўзларининг токенларини жойлаштирган ташкилотларни ва уларнинг мулкий хавфсизлиги бор-йўқлигини текширишлари шарт. Шунингдек, жалб қилиниши режалаштирилган сумманинг камида 10 фоизи криптобиржасининг махсус ҳисоб рақамига киритилиши керак.

Чиқарилган токенларнинг номланиши ёки рамзларида “давлат”, “давлат томонидан таъминланган”, “давлат томонидан қўллаб-қувватланган”, “Ўзбекистон”, “ўзбек”, “миллий”, “сўм (UZS)” ҳамда Ўзбекистон Республикаси шаҳарларининг номларини тўлиқ ёки қисқартирилган шаклда, шунингдек уларнинг бирликларидан фойдаланган ҳолда, исталган тилда ва ҳар қандай шаклда ишлатишни тақиқланди.

Суннатилла Абдуллаев
Мақолага баҳо беринг
Баҳолаганлар: 237
Рейтинг: 2.9
t
×