Ўзбекистонликлар ҳаётида 1 августдан нималар ўзгаради?

Жорий йилнинг 1 августидан бошлаб Ўзбекистонда бир қанча қарорларда белгиланган тартиблар кучга киради. QALAMPIR.UZ миллий қонунчиликдаги ўзгаришлар рўйхатини тақдим этади.

Ота-оналар фарзандларининг таълими учун йўналтирган маблағлари бўйича даромад солиғидан озод этилади

Фарзандларнинг республика таълим ташкилотларида таълим олишлари учун йўналтириладиган тўловлари солиққа тортилмайдиган даромадлар тоифасига киритилади.

Алкоголь ишлаб чиқарувчиларга қўшимча талаб

Эндиликда ишлаб чиқарувчилар алкоголь маҳсулотларининг товар белгилари Адлия вазирлиги томонидан рўйхатга олинганлиги тўғрисидаги гувоҳномага эга бўлиши шарт.

Давлат органлари раҳбарлари IT'га ўқитилади

Давлат органларининг биринчи раҳбарлари Давлат бошқаруви академиясида рақамли технологияларни кенг жорий этиш ва лойиҳаларни самарали амалга ошириш бўйича қисқа муддатли курсларда ўқитилади.

Ёшлар учун ажратилган микроқарз ва субсидияларни банк картасига ўтказиш мумкин бўлади

Ёшларга компьютер харидлари учун ажратиладиган маблағлар ҳисобидан микроқарз шаклида ҳамда “Ёшлар дафтари”, Камбағалликни қисқартириш ва бандлик вазирлиги Жамғармалари ҳисобидан бериладиган субсидия маблағларини алоҳида очилган банк картасига (нақдлаштириш имкониятисиз) ўтказишга рухсат берилади.

Давлат органларининг IT соҳасида ишловчи малакали ходимларига устамалар тўланади

АКТ соҳасидаги халқаро сертификатга эга бўлган давлат органлари ва бошқа бюджет ташкилотларининг ахборот технологиялари ва коммуникацияларини ривожлантириш учун масъул ходимларига ўрнатилган устамаларга қўшимча равишда лавозим маошига нисбатан 20 фоиз миқдорда устама тўланади.

Тиббиёт муассасаларида – янги штат бирликлари

Қуйидаги лавозимлар жорий этилмоқда:

• туман (шаҳар) кўп тармоқли марказий поликлиникаларида Аҳолининг соғлом турмуш тарзини қўллаб-қувватлаш ва жисмоний фаоллигини ошириш марказининг туман (шаҳар) бўлинмалари штатларини қисқартириш ҳисобидан – тиббий психолог;
• стационар ўринга эга бўлмаган руҳий-асаб касалликлари диспансерлари ва таркибида диспансер мавжуд бўлган руҳий касалликлар шифохоналарида – суицидолог;
• стационар ўринга эга бўлган руҳий-асаб касалликлари диспансерлари ва руҳий касалликлар шифохоналарида – амалдаги штатлар доирасида қабул бўлими шифокори, навбатчи психиатр, тиббий психолог ёки психотерапевт штатлари.

Тадбиркорлар ҳисоб рақамидан маблағларни ноқонуний равишда ечганлик учун – жиноий жавобгарлик

11 августдан тадбиркорларнинг банк ҳисобварақларидан пул маблағларини уларнинг розилигисиз қонунга хилоф равишда ўтказиш ёки олиб қўйганлик учун маъмурий ва жиноий жавобгарлик белгиланмоқда.

Учта қонун кучга кирмоқда

• “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги Қонун – 26 августдан;
• “Техник жиҳатдан тартибга солиш тўғрисида”ги Қонун;
• “Мувофиқликни баҳолаш органларини аккредитация қилиш тўғрисида”ги Қонун – 29 августдан.