Ўзбекистонлик таэквондочилар жаҳон рейтингида пешқадамга айланди

Кеча, 11 февраль куни Бутунжаҳон таэквондо федерацияси февраль ойи учун янгиланган жаҳон рейтингини эълон қилди. Унда Ўзбекистон терма жамоасининг икки нафар аъзоси Нажмиддин Қосимхожиев ва Светлана Осипова ўз вазн тоифаларида етакчилик қилмоқда. Бу ҳақда мамлакат таэквондо WT ассоциацияси матбуот хизмати маълум қилди. 

Бутунжаҳон таэквондо федерацияси янгиланган жаҳон рейтингига кўра, 74 кг вазн тоифаси рейтингида 185.40 очко билан Нажмиддин Қосимхожиев етакчилик қилмоқда. Шунингдек, 73 кг ва ундан юқори бўлган вазн тоифаси рейтингида Светлана Осипова етакчилик қилмоқда. Унинг ҳисобида 210.20 рейтинг очко мавжуд.

Бундан ташқари, 54 кг гача бўлган вазн тоифасида Жаҳонгир Худойбердиев ушбу рейтингда учинчи ўринни эгаллаган.

Эслатиб ўтамиз, аввалроқ Нажмиддин Қосимхожиев Хитойнинг Уси шаҳрида бўлиб ўтган таэквондо WТ бўйича катталар ўртасидаги Жаҳон чемпионатида олтин медални, Светлана Осипова эса кумуш медални қўлга киритганди.