Ўзбекистонлик аёл Туркияда руҳий касалликлар шифохонасига ётқизилди

Ўзбекистонлик аёл Туркиянинг Истанбул шаҳрида руҳий ва неврологик касалликлар шифохонасига ётқизилди. Барча текширувлардан сўнг у Ўзбекистонга депортация қилинади. Бу ҳақда маҳаллий нашрлар хабар берди. 

Қайд этилишича, жорий йилнинг 5 июль куни тунги соат 1:12 да Истанбул шаҳрининг Эсенюрт туманидаги ёқилғи қуйиш шохобчаси олдида ўзбекистонлик аёлнинг ноодатий ҳаракатлари полиция ходимларининг эътиборини тортган. Аёл полиция томонидан ўша заҳоти қўлга олинган, сўнг у Ўзбекистон фуқароси Ф.Ф. экани аниқланган.

Хабарга кўра, аёл ҳаддан ташқари истеъмол қилинган спиртли ичимлик таъсирида бўлган ва ҳаракатларини бошқара олмаган. 

Воқеа жойига чақирилган тиббий гуруҳлар томонидан шифохонага ётқизилган аёл, даволангандан сўнг Бакиркўй тумани Руҳий ва неврологик касалликлар шифохонасига юборилган. Мазкур шифохонада муолажалари якунланган аёлга нисбатан “Йўл ҳаракати хавфсизлигига таҳдид солиш” жинояти бўйича суд иши қўзғатилган. Текширувлар натижасида ушбу шахс 22 июнь куни мамлакатга қонуний йўл билан киргани аниқланган.  

Жиноят иши билан боғлиқ жараёнлардан сўнг у депортация қилиш учун туман Иммиграция маъмурияти олиб кетиш марказига топширилиши айтилмоқда.

Эслатиб ўтамиз, Туркиянинг Истанбул шаҳридаги кўп қаватли уйнинг биринчи қаватидаги хонадонда портлаш содир бўлиши оқибатида ушбу хонадонда яшаб келаётган ўзбекистонлик 64 яшар Мағфират Ғуломова жароҳатланганди.