Ўзбекистонда қурилиш материалларининг 98 фоизи маҳаллий ишлаб чиқарилмоқда

Сўнгги ўн йилда қурилиш материаллари саноатига 12 миллиард доллар инвестиция киритилиб, 4 мингдан ортиқ янги корхона ишга туширилди. Натижада мамлакатда уй-жой ва саноат объектлари қурилиши учун зарур материалларнинг 98 фоизини маҳаллий ишлаб чиқариш йўлга қўйилди. Бу ҳақда Президент Шавкат Мирзиёев раислигида ўтаётган видеоселектор йиғилишида айтиб ўтилди.

Президент Шавкат Мирзиёев қурилиш материаллари саноатини қурувчиларнинг ишончини қозонган, сифат, стандарт, ассортимент ва нарх бўйича комплекс ечим таклиф қиладиган тармоққа айлантириш зарурлигини таъкидлаган.

Қайд этилишича, бундан 10 йил аввал маҳаллий қурилиш материаллари асосан қум-шағал, ғишт, цемент, ойна ва шифердан иборат бўлиб, улар қурилишда фойдаланиладиган материалларнинг атиги 35–40 фоизини қамраб олган.

Сўнгги ўн йилда эса соҳага 12 миллиард доллар инвестиция йўналтирилиб, 4 мингдан ортиқ замонавий корхона фаолияти йўлга қўйилди. Натижада цемент, ойна, базальт, керамика маҳсулотлари, газоблок ва қуруқ қурилиш қоришмалари каби 20 дан ортиқ асосий турдаги маҳсулотларга бўлган ички талабни тўлиқ қоплайдиган ишлаб чиқариш қувватлари яратилди.

Шунингдек, иссиқликни сақловчи материаллар, композит маҳсулотлар, экологик пардозлаш материаллари ва замонавий пол қопламалари каби юқори қўшилган қийматга эга йўналишлар ҳам жадал ривожланмоқда.

Президент таъкидлашича, бугунги кунда янги уй-жойлар ва саноат бинолари қурилиши учун зарур бўлган материалларнинг 98 фоизи мамлакатнинг ўзида ишлаб чиқарилмоқда. Бунинг натижасида тармоқда ишлаб чиқариш ҳажми 7 триллион сўмдан 53 триллион сўмга етган.

Шунингдек, ўтган йили қурилиш материаллари экспорти 1,2 миллиард долларни ташкил этди. Қайд этилишича, тармоқ сўнгги йилларда импорт ўрнини босиш бўйича муҳим босқични муваффақиятли ортда қолдирган.

Эслатиб ўтамиз, аввалроқ Шавкат Мирзиёев ҳокимлар қайси ҳудудда қайси тармоқни ривожлантириш ва қайси лойиҳага инвестиция жалб этиш энг юқори самара беришини аниқ ҳисоб-китоб қилиши кераклигини таъкидлаганди.