Ўзбекистонда футболни қўллаб-қувватлаш жамғармаси тузилади

Ўзбекистонда футбол инфратузилмасини ривожлантириш учун Ўзбекистон футболини қўллаб-қувватлаш жамғармаси тузилади. Бу ҳақда Президент матбуот хизмати хабар берди. 

Маълум қилинишича, Президент Шавкат Мирзиёев бугун, 6 апрель куни ёшлар сиёсати ва спортни ривожлантириш бўйича таклифлар тақдимоти билан танишган. Унда футбол инфратузилмасини ривожлантириш учун Ўзбекистон футболини ривожлантириш жамғармаси тузилиши маълум қилинди. 

Шунингдек, иқтидорли футболчиларни танлаш ва тайёрлашнинг узвийлигини таъминлаш мақсадида Ўзбекистон футбол ассоциацияси ҳузурида 14 та футбол мактаби, "Дўстлик" стадиони негизида барча ёш тоифалари учун Терма жамоалар маркази ташкил этилиши, футбол бўйича мутахассисларни тайёрлаш маркази фаолияти такомиллаштирилиб, Хорватия, Япония ва бошқа давлатлардан мутахассислар жалб қилиниши қайд этилди. 

Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари ҳудудий футбол ассоциацияларининг раҳбарлари этиб белгиланиши маълум қилинди. 

Бундан ташқари, давлат раҳбарига ФИФАнинг махсус дастури асосида боғча ва маҳаллаларда "Оммавий футбол", ўрта таълимда "Мактабларда футбол" ҳамда олий ўқув юртларида "Талабалар лигаси" дастурларини жорий қилиш таклифи билдирилди.

Эслатиб ўтамиз, аввалроқ Шавкат Мирзиёев Наврўз байрами тантаналарида ўзбекистонликларни қўшалоқ байрам, яъни футбол бўйича мамлакат ёшлар терма жамоасининг Осиё чемпиони бўлгани билан табриклаган эди.

Нодиржон Мадаминов