Ўзбекистонда электр истеъмоли бўйича тўртинчи рекорд қайд этилди

Ўзбекистон ягона энергетика тизимида кеча, 17 июль куни электр энергияси истеъмоли ва ишлаб чиқариш ҳажми бўйича янги рекорд қайд этилди. Бу ҳақда Энергетика вазирлиги хабар берди.

Маълум қилинишича, 17 июль куни суткалик электр энергияси истеъмоли 293,4 миллион киловатт-соатни ташкил этган. Бу ўтган йил ёз мавсумида қайд этилган энг юқори кўрсаткичдан 20,8 миллион киловатт-соат ёки 7,6 фоизга юқори.

Шунингдек, суткалик электр энергияси ишлаб чиқариш ҳажми ҳам 296,1 миллион киловатт-соатга етиб, янги рекорд ўрнатилган. Мазкур кўрсаткич жорий йилнинг 16 июлида қайд этилган 295,4 миллион киловатт-соатлик рекорддан 0,7 миллион киловатт-соат ёки 0,24 фоизга кўп.

Вазирлик маълумотига кўра, кичик қувватли қуёш фотоэлектр станцияларида ишлаб чиқарилган электр энергияси билан бирга ҳисоблаганда, 17 июль куни жами 305 миллион киловатт-соат электр энергияси ишлаб чиқарилган. Бу аввалги кундагисига нисбатан 9,6 миллион киловатт-соат ёки 3,2 фоизга кўпдир.

Қайд этилишича, диспетчерлик хизматлари электр тармоқларидаги юклама, электр узатиш тармоқлари ҳамда трансформаторларнинг техник ҳолатини реал вақт режимида доимий назорат қилиб боради. Зарурат туғилганда ускуналарнинг ортиқча юкланиши ва қизиб кетишининг олдини олиш мақсадида юкламани қайта тақсимлаш ҳамда бошқа тезкор чоралар кўрилади.

Эслатиб ўтамиз, аввалроқ электр тармоқларида юзага келган ўта юқори юклама сабаб айрим ҳудудларда электр таъминоти 2 соатгача вақтинча чеклангани ҳақида хабар берилган эди.