Ўзбекистонда 2,5 ойда 327 млрд сўмлик газ ўғирланди

Ўзбекистонда 2024 йил 1 декабрдан жорий йил 15 февралгача 327 млрд сўмлик газдан ноқонуний фойдаланилди. Бу ҳақда Энергетика вазирлиги хабар берди. 

Қайд этилишича, ушбу муддат ичида табиий газдан ноқонуний фойдаланилган 167 та ҳолат аниқланган. Бу орқали 82 млн 158,9 минг куб метр табиий газдан асоссиз фойдаланилиб, давлат манфаатларига 210 млрд 428,2 миллион сўмлик зарар етказилган.

Шунингдек, “Ҳудудгазтаъминот” АЖ масъул ходимлари томонидан мазкур даврда 6472 та ноқонуний фойдаланиш ҳолати аниқланган. Ушбу ҳолатлар бўйича 50 млн 890 минг куб метр табиий газ учун 117 млрд 300 млн сўм миқдорида қайта ҳисоб-китоб қилинган.

Қолаверса, шу вақт оралиғида 4942 дона маиший газ баллонида 77,8 тонна (36 минг куб метрга тенг) ҳажмдаги суюлтирилган газнинг ноқонуний сотилиши олди олинган.

“Айтиш ўринлики, ҳисобот даврида ноқонуний фойдаланилган табиий газ ҳажми 133 млн 84,9 минг куб метр бўлиб, бу миқдордаги табиий газ 266 минг 170 та хонадоннинг қишки даврдаги бир ойлик меъёрий базасига тенгдир. Қолаверса, агар ушбу газ ресурсларидан оқилона фойдаланилганида, метан заправкалар 10 кун давомида узлуксиз ишлаш имкониятига эга бўларди”, дейилади хабарда.

Маълум қилинишича, аниқланган барча ҳолат бўйича тегишли ҳужжатлар расмийлаштирилиб, назорат органларига юборилган.

Эслатиб ўтамиз, аввалроқ Сирдарё вилоятида 5,7 млрд сўмлик табиий газдан ноқонуний фойдаланган метан “заправка”га алоқадор шахслар текширувга келган “Ўзэнергоинспекция” ходимининг машинасига гиёҳванд модда ташлаб кетгани фош этилганди.