Ўзбекистон ва АҚШ 12 миллиард долларлик шартномалар пакетини имзолади

Америка делегациясининг Ўзбекистонга ташрифи доирасида ўтказилган бизнес тадбирлари доирасида савдо, инвестиция ва технологик ҳамкорлик соҳасида умумий қиймати 12 миллиард АҚШ долларини ташкил этувчи 54 та шартномадан иборат пакет имзоланди. Бу ҳақда Инвестициялар, саноат ва савдо вазирлиги матбуот котиби Станислав Баграмов QALAMPIR.UZ’га маълум қилди.

Қайд этилишича, эришилган келишувлар Ўзбекистонда саноат, транспорт ва энергетика инфратузилмасини модернизация қилиш, муҳим фойдали қазилма конларини ўзлаштириш, молия сектори, рақамли технологиялар, қишлоқ хўжалиги, соғлиқни сақлаш ва таълимни ривожлантиришга қаратилган.

Транспорт соҳасида GE Aerospace билан ҳамкорлик Uzbekistan Airways’нинг янги самолётлари учун двигателлар етказиб беришни назарда тутади, Wabtec билан ташаббуслар эса темир йўл техникаси ва бутловчи қисмларини маҳаллийлаштиришга қаратилган. Бу соҳани технологик янгилаш ва ишлаб чиқариш имкониятларини кенгайтириш учун замин яратади.

Шунингдек, молия секторида Franklin Templeton, Oppenheimer & Co., Citigroup ва BlackRock билан тузилган битимлар миллий компанияларнинг халқаро капитал бозорларига чиқиши, институционал инвесторларни жалб қилиш ва инфратузилмавий ташаббусларни молиялаштиришни қамраб олади.

Кон-ишлаб чиқариш саноатида ReElement Technologies, Traxys ва Trafigura билан ҳамкорлик конларни ўрганиш ва ўзлаштириш, технологик кооперация ҳамда минерал ресурсларни етказиб бериш билан боғлиқ. Критик минераллар соҳасида миллий компетенцияларни ривожлантиришга алоҳида эътибор қаратилмоқда.

Рақамли ва ижтимоий соҳаларда Amazon Leo, GE HealthCare ва Valmont Industries билан амалга оширилаётган ташаббуслар сунъий йўлдош алоқасини ривожлантириш, замонавий тиббиёт технологияларини жорий этиш ва қишлоқ хўжалиги самарадорлигини оширишни назарда тутади.

“Имзоланган пакет халқаро капитал ва илғор технологияларни Ўзбекистоннинг саноат салоҳияти билан бирлаштирган ҳолда, ўзбек-америка иқтисодий ҳамкорлигининг янги босқичига пойдевор қўяди. Қабул қилинган келишувларни конкрет натижаларга айлантириш кейинги устувор вазифа бўлади”, дейилади хабарда.