Ўзбекистон озиқ-овқат энг арзон давлатлар йигирмалигига кирди

Жорий йил бошида Ўзбекистон озиқ-овқат нархлари индекси бўйича дунёда 139 та мамлакат орасида 18-ўринни эгаллади. Мамлакат учун индекс қиймати 26,6 ни ташкил этди. Бу ҳақда “Numbeo” томонидан тузилган статистикада келтирилган.

Озиқ-овқат нархлари индекси турли давлатлардаги истеъмол саватчаси нисбий қийматини акс эттиради ва Нью-Йоркдаги нархларни 100 фоиз деб олади. Натижада индекс қанча паст бўлса, мамлакатда маҳсулотлар шунчалик арзон бўлади ва ёки аксинча.

Ўзбекистон учун индекс 26,6 га тенг, яъни мамлакатдаги озиқ-овқат маҳсулотлари Нью-Йоркдагидан ўртача 73,4 фоиз арзон.

Дунёдаги энг “арзон” давлатлар қаторига Покистон, Афғонистон, Миср, Эрон ва Мадагаскар кирган. Энг “қиммат” давлатлар эса Виржиния ороллари, Швейцария ва Исландия бўлиб қолмоқда.

МДҲ давлатлари орасида Ўзбекистондан юқорироқ ўринларни Беларусь ва Украина эгаллаган, яъни ушбу давлатларда озиқ-овқат нархлари Ўзбекистонга қараганда пастроқ. Бироқ Қозоғистон, Қирғизистон, Озарбайжон, Молдова ва Арманистонда маҳсулотлар Ўзбекистонга қараганда қимматроқ.

Эслатиб ўтамиз, аввалроқ “Numbeo” портали томонидан 2025 йил учун ресторан нархлари индекси бўйича тузилган рейтингда Ўзбекистон дунёдаги 139 мамлакат орасида 17-ўринни эгаллаган эди. Бунда ҳам МДҲ давлатлари орасида энг арзон ресторан хизматлари Ўзбекистонда экани аниқланган.