Ўзбекистон мактабларида биринчи синфга қабул қачондан бошланиши маълум қилинди

Ўзбекистон мактабларида биринчи синфга қабул бугун, 20 июндан бошланди. Бу ҳақда Мактабгача ва мактаб таълими вазирлиги Матбуот хизмати хабар берди. 

Маълум қилинишича, ўрнатилган тартибга кўра, биринчи синфга қабул икки босқичда амалга оширилади. 

1-босқич: микро-ҳудуд доирасида (20 июндан 31 июлгача); 

2-босқич: микро-ҳудуддан ташқарида (1-15 август кунлари). 

Қабул жараёни мамлакатнинг 43 та туманида электрон шаклда ўтказилади. Бунда ота-оналар 20 июнь соат 12:00 дан бошлаб my.maktab.uz электрон платформаси орқали рўйхатдан ўтиб, ариза топшириши мумкин. Вазирликка электрон шаклда ҳужжат топширилувчи туманлар рўйхати ҳам тасдиқланган.

Қолган барча туманларда эса аризалар анъанавий шаклда, мактаб томонидан қабул қилинади. Биринчи синфга қабул қилинган ўқувчилар вазирлик электрон тизими (adm.maktab.uz)га киритилади ва назорат қилиб борилади. 

Шунингдек, вазирлик Матбуот хизмати хабарида “Таълим тўғрисида”ги қонуннинг 9-моддасига асосан болалар, улар 7 ёшга тўладиган йилда мактабга қабул қилинишини эслатган. Шунга кўра, бу йил 1 синфларга 2016 йилнинг 1 январидан 31 декабрига қадар туғилган болалар қабул қилинади.