Ўзбекистон компанияси ҳам ЕИнинг Россияга қарши санкцияларига “илинди”

Европа Иттифоқи Россиянинг Украинага тўлиқ босқини бошлаганининг уч йиллиги муносабати билан Россияга қарши 16-санкциялар пакетини жорий этди. Ушбу санкциялар пакетига Ўзбекистонда фаолият юритувчи Uzstanex компанияси ҳам киритилди. Бу ҳақда ЕИ кенгаши хабар берди.

north_east

Европа Иттифоқи Россияга қарши 16-санкция пакетини қабул қилди

Санкцияларга саккизта Россия оммавий ахборот воситаси дучор бўлган, шунингдек, Европа Иттифоқи Россиянинг “муҳим аҳамиятга эга молиявий ва банк тизими” ҳисобланган 13 та минтақавий банкини SWIFT тизимидан узиб қўйган. Россия ҳарбий-саноат комплексини қўллаб-қувватловчи ёки санкцияларни четлаб ўтиш билан шуғулланадиган 53 та компания ҳам чекловга учради. Улардан 19 таси Россияда, қолган 34 таси эса учинчи давлатларда жойлашган. Хусусан, Хитойдан 25 та, Гонконгдан 2 та, Ҳиндистондан 2 та, Қозоғистондан, 2 та, БААдан 2 та, Ўзбекистондан 1 та, Туркиядан 1 та, Сингапурдан 1 та компания санкциялар остига тушган.

Ўзбекистондан санкциялар рўйхатига Uzstanex компанияси киритилган. Ягона давлат реестрига кўра, Uzstanex 2018 йил июль ойида рўйхатдан ўтган бўлиб, механик дастгоҳларнинг улгуржи савдоси билан шуғулланади. Ташкилот Тошкент шаҳрининг Яшнобод туманида жойлашган бўлиб, устав капитали 65 миллион сўмни ташкил этади. Компаниянинг ягона таъсисчиси – Василий Виталевич Абрамов, директори эса Дмитрий Александрович Бойсов.

Эслатиб ўтамиз, 2024 йил кузида ушбу компанияга АҚШ ва Буюк Британия ҳам санкциялар қўллаган эди.