O‘zbekiston kasaba uyushmalari Federatsiyasi raisi qayta saylandi

Kasaba uyushmalari federatsiyasining VIII qurultoyida Qudratilla Mirsagatovich Rafiqov O‘zbekiston kasaba uyushmalari Federatsiyasi raisi lavozimiga bir ovozdan saylandi. Bu haqda Kasaba uyushmalari Federatsiyasi axborot xizmati xabar qildi.

Qayd etilishicha, uning nomzodi Oqsoqollar Kengashi tomonidan tavsiya qilindi. Ochiq ovoz berish yo‘li bilan o‘tkazilgan saylovda O‘zbekiston Bosh vaziri Abdulla Aripov ham ishtirok etdi.

Qudratilla Rafiqov 1947 yilda tug‘ilgan. 1993-1998 yillarda O‘zbekiston kasaba uyushmalari Federatsiyasi Kengashi raisi muovini, 1998 yildan 2003 yilgacha Jizzax viloyati kasaba uyushmalari Kengashi raisi lavozimida faoliyat ko‘rsatgan. Keyinroq "Jizzax akkumulyator zavodi" AJ bosh direktori lavozimida ishlagan. 2016 yil dekabrida esa Tanzila Norboyeva o‘rniga O‘zbekiston kasaba uyushmalari Federatsiyasining yangi rahbari etib saylangandi.

U senator, Senatning Yoshlar, madaniyat va sport masalalari qo‘mitasi a’zosi hisoblanadi.