Ўзбекистон Бош вазири Имомали Раҳмонга Шавкат Мирзиёевнинг саломини етказди

north_east

Арипов қўшимча сув етказиб бергани учун Тожикистон томонига миннатдорлик билдирди

Бугун, 29 сентябрь куни Ўзбекистон Республикаси Бош вазири Абдулла Арипов Тожикистон Республикаси Президенти Имомали Раҳмон билан учрашди.

Абдулла Арипов Тожикистон Президентига қабул учун миннатдорлик изҳор этиб, Ўзбекистон Республикаси Президенти Шавкат Мирзиёевнинг самимий саломи ва тилакларини етказди.

Имомали Раҳмон, ўз навбатида, Шавкат Мирзиёев номига ўзининг саломи ва эзгу тилакларини билдириб, Олий даражада эришилган келишувларни амалга оширишда ҳукуматлараро комиссия фаолияти муҳим ўрин тутаётганини таъкидлади.

Икки мамлакат ўртасидаги сиёсий, савдо-иқтисодий, транспорт-коммуникация, энергетика, қишлоқ ва сув хўжалиги ҳамда бошқа етакчи соҳалардаги ҳамкорлик йилдан-йилга ривожланиб бораётгани қайд этилди.

Хусусан, биргина Ўзбекистон Республикаси билан Тожикистон Республикаси ўртасидаги ҳамкорликни жадаллаштиришга қаратилган чора-тадбирлар режасига мувофиқ, сентябрь ойининг ўзида Душанбе шаҳрида таниқли олимлар, тадқиқотчилар ва етакчи экспертлар иштирокида илмий-амалий анжуман ташкил этилди. Ўзбекистон – Тожикистон парламентлараро ҳамкорлик гуруҳлари ишчи йиғилиши ўтказилди. Сўғд вилоятининг Спитамен туманида Ўзбекистон томонидан 630 ўқувчига мўлжалланган умумий ўрта таълим мактаби қурилиб, фойдаланишга топширилди.

Ушбу қатор соҳаларни қамраб олган тадбирлар ўзаро алоқаларни мазмунан янада бойитгани қайд этилди.

Очиқ ва самимий руҳда ўтган мулоқот давомида мамлакатлар ҳамкорлигини ривожлантириш истиқболлари юзасидан фикр алмашилди.