O‘zbekiston AQSHning bir qator tovarlari uchun tariflarni pasaytiradi

O‘zbekiston va AQSH savdo bo‘yicha dastlabki kelishuvga erishdi. Unga ko‘ra, O‘zbekiston AQSHning sanoat mahsulotlari va qishloq xo‘jaligi mahsulotlarining keng turlari uchun bojlarni bekor qiladi yoki kamaytiradi hamda o‘zaro savdo va investitsiyalar to‘g‘risidagi bitim muzokaralarini jadallashtiradi. Bu haqda joriy yilning 25 iyun kuni AQSH Savdo vakilining rasmiy saytida xabar qilindi.

Qayd etilishicha, AQSHning Savdo vakili Jeymison Grirning O‘zbekistonga tashrifi doirasida AQSH va O‘zbekiston ikki tomonlama iqtisodiy va investitsiyaviy hamkorlikni mustahkamlash, shuningdek, o‘zaro savdoda tenglik, muvozanat va barqarorlikni ta’minlashga qaratilgan savdo majburiyatlarining dastlabki bosqichi (early harvest) bo‘yicha kelishuvga erishgan.

O‘sha kuni O‘zbekiston Prezidenti Administratsiyasi rahbari Saida Mirziyoyeva ham o‘zining Telegram-kanalida Jeymison Grir bilan uchrashganini ma’lum qilgan. Shuningdek, Prezident Administratsiyasi rahbari yaqin kunlarda ikki mamlakat o‘rtasida o‘zaro savdo va investitsiyalarni rag‘batlantirish to‘g‘risidagi bitim imzolanishini kutilayotganini qayd etgan.

“AQSH Savdo vakili, elchi Jeymison Grir bilan Toshkentda uchrashib turganimdan xursandman. O‘tgan bir yil davomida birgalikda juda salmoqli ishlarni amalga oshirdik, buning natijasida aloqalarimiz yangi bosqichga ko‘tarildi.O‘zbekistonga hamda ikki tomonlama hamkorligimizga ko‘rsatayotgan yuksak e’tibori uchun elchi janoblariga minnatdorlik bildiraman”, degan Mirziyoyeva.

AQSH Savdo vakilining qayd etishicha, ikki mamlakat o‘zaro savdo va investitsiyalar to‘g‘risidagi bitimni tez fursatda yakunlash maqsadida muzokaralarni jadallashtirishga ham kelishib olgan hamda vakillar yaqin haftalarda mazkur dastlabki kelishuvni rasmiy hujjat shaklida mustahkamlaydi.

“Bu kelishuvlar 2025 yilda AQSH Prezidenti Donald Tramp va O‘zbekiston Prezidenti Shavkat Mirziyoyev o‘rtasida bo‘lib o‘tgan uchrashuvlar davomi hisoblanadi hamda ikki mamlakatning strategik va iqtisodiy sheriklikni yanada mustahkamlashga bo‘lgan qat’iy intilishini tasdiqlaydi”, deyiladi xabarda.

Ma’lum qilinishicha, savdo va investitsiyalar bo‘yicha ushbu dastlabki kelishuv quyidagilarni nazarda tutadi:

• O‘zbekiston AQSHning sanoat mahsulotlari va qishloq xo‘jaligi mahsulotlarining keng turlari uchun bojlarni bekor qiladi yoki kamaytiradi;
• AQSH esa o‘z qonunchiligiga muvofiq va zarur deb topilgan hollarda O‘zbekistonning sanoat va qishloq xo‘jaligi mahsulotlariga nisbatan tarif choralarini qo‘llashda qulay yondashuvni ko‘rib chiqadi;
• AQSH va O‘zbekiston investitsiya sohasidagi hamkorlikni mustahkamlash hamda ikki tomonlama investitsiyalarni rag‘batlantirish va yengillashtirish yo‘llarini o‘rganishga kelishdi;
• Ikki mamlakat O‘zaro savdo va investitsiyalar to‘g‘risidagi bitim bo‘yicha muzokaralarni jadallashtiradi.

“Ushbu e’lonlar o‘tgan yili Prezidentlar Donald Tramp va Shavkat Mirziyoyev tomonidan ma’lum qilingan 32 milliard dollarlik ikki tomonlama tijorat bitimlaridan keyingi yana bir muhim qadam hisoblanadi. Bu kelishuvlar qatoriga Boeing kompaniyasi bilan 8,5 milliard dollarlik shartnoma, shuningdek, strategik minerallar, tog‘-kon sanoati, energetika, moliya va axborot texnologiyalari sohalaridagi xaridlar hamda investitsiyalar kiradi”, deyiladi xabarda.

Shu bilan birga, AQSH tarafi O‘zbekistonning Jahon savdo tashkilotiga a’zo bo‘lish jarayonini qat’iy qo‘llab-quvvatlashi va bu borada mamlakat erishgan sezilarli taraqqiyotni e’tirof etishini bildirgan.