Ўзбекистон – Ҳиндистон қўшма ҳарбий машғулотлари ўтказилмоқда

Бугун, 15 апрель куни Ўзбекистон ва Ҳиндистон Мудофаа вазирликлари бўлинмалари ўртасида "Термиз" ҳарбий полигонида "Дўстлик" қўшма ҳарбий ўқув машғулотлари бошланди. Бу ҳақда "Дунё" АА хабар берди. 

Унга кўра, бу икки давлат ўртасидаги бешинчи ҳарбий машғулот ҳисобланади. 2019 йилдан буён шу пайтгача "Дўстлик" машғулотлари ҳар икки давлатда икки мартадан ўтказилган.

Аввалгиларидан фарқли равишда навбатдаги қўшма тадбирда томонларнинг 60 нафардан ҳарбий хизматчиси иштирок этяпти. Шунингдек, қуруқликдаги қўшинлар вакилларига ҳарбий ҳаво кучлари мутахассислари ҳам қўшилган.

Машғулотларда ҳарбий бўлинмалар ўртасида терроризмга қарши биргаликда курашиш ва бошқа операцияларни амалга оширишда мувофиқлаштирилган ҳаракатлар ва жипсликни оширишга асосий эътибор қаратилади.

Ўзбекистонда ташкил этилаётган ҳамкорликдаги ҳарбий ўқув машғулотлари Ҳиндистон оммавий ахборот воситаларида кенг ёритилмоқда.

Хусусан, давлат телеканаллари, Asian News International ахборот агентлиги, The Economic Times газетаси, The Print ахборот портали ва бошқа оммабоп манбаларда қўшма ҳарбий машғулотларнинг тарихи ва аҳамияти ҳақида мақолалар чоп этилган.

Икки давлат мудофаа идоралари ўртасидаги ҳамкорлик режасига мувофиқ ташкил этилган машғулотлар 28 апрелгача давом этади.