“Ўткан кунлар” романи араб тилига таржима қилинади

Мисрнинг “Айн Шамс” университети профессори, ёзувчи, таржимон Муҳаммад ал-Жибали Абдулла Қодирийнинг “Ўткан кунлар” романини араб тилига таржима қилаётгани маълум бўлди. Бу ҳақда “Дунё” Ахборот агентлиги хабар берди.

Ўзбекистоннинг Мисрдаги элчихонасининг маълум қилишича, Муҳаммад ал-Жибали Тошкентда бўлгани чоғида Абдулла Қодирий уй музейида бўлиб, ёзувчининг набиралари билан учрашиб, ўзбек маданияти ва тарихи билан яқиндан танишган. Профессор “Ўткан кунлар” романининг араб тилига таржима қилиниши, нафақат Миср, балки бутун араб дунёсида илиқ кутиб олинишига ишонч билдирмоқда.

Мутахассиснинг қайд этишича, араб тилининг синонимларга ниҳоятда бойлиги, ҳар бир ҳаракат ва ҳолатни турли усулларда тасвирлаш хусусияти, икки халқнинг маданий-маънавий жиҳатдан яқинлиги романнинг ушбу таржимаси бошқа хорижий тиллардаги таржималаридан сезиларли даражада сифатли бўлишига ва бадиий гўзалликни сақлаб қолишга имкон беради.

Романдаги ўзбекона руҳни акс эттириш, таржима сифатини ошириш мақсадида таржима муаллифига Ўзбекистоннинг Мисрдаги элчихонаси маданий масалалар бўйича атташеси Отабек Алимов ҳозирги пайтда Қоҳирада истиқомат қилаётган ўзбекистонлик Ҳусан Абдумажидов, болалик чоғларидан буён Саудия Арабистонида яшаб таҳсил олган, ёзувчи, таржимон Саид Маҳмуд Косоний ва бошқалар кўмаклашмоқда. Асардаги баъзи араб имлосида (эски ўзбек ёзуви) битилган атамаларни асл ҳолида сақлаб қолиш учун романнинг илк нусхаси Абдулла Қодирийнинг набиралари томонидан тақдим этилди.

“Ўткан кунлар”нинг араб тилига таржимаси романнинг 100 йиллиги арафасида 2024 йили тайёр бўлиши ва минтақадаги энг йирик ва нуфузли 55-Қоҳира халқаро китоб ярмаркасида тақдим этилиши режалаштирилмоқда.

Маълумот учун, роман 1920 йиллар бошида ёзилган бўлиб, 1922 йил илк бор “Инқилоб” журналида чоп этилган, 1926 йилда ўзбек тилида мослаштирилган араб ёзувида, алоҳида китоб ҳолида нашр қилинган. 1926 йилдаги цензура дахл қилмаган асл нашрига асосланган илк тўлиқ нашри Тошкентда  кирилл алифбосида 1994 йили чоп этилган.