Ўшда Ўзбекистонга “таблетка” етказиб берувчи гуруҳ ушланди (видео)

Қирғизистоннинг Ўш шаҳрида Ўзбекистонга кучли таъсир қилувчи дори воситаларини контрабанда йўли билан етказиб бериш каналини ташкил қилган жиноий гуруҳ йўқ қилинди. Бу ҳақда Қирғизистон Ички ишлар вазирлигининг Наркотик моддалар ноқонуний айланмасига қарши кураш хизмати хабар берди.

Қайд этилишича, Қорасув тумани прокуратураси ва Қорасув тумани ИИБ тергов хизмати билан ҳамкорликда тезкор тадбир амалга оширилган. Қирғизистон Жиноят кодексининг 292-моддаси 2-қисми бўйича жиноий иш очилган ва ноқонуний дорилар савдосига алоқадор етти киши ҳибсга олинган.

Кўп босқичли махсус операция давомида ҳибсга олинган шахслардан катта миқдорда кучли таъсир қилувчи дорилар мусодара қилинган. Ушбу дорилар фақатгина Қирғизистон Соғлиқни сақлаш вазирлигининг 2023 йил 26 сентябрдаги тегишли буйруғига мувофиқ шифокор рецепти асосида реализация қилиниши мумкин.

Мусодара қилинган дориларнинг умумий бозор қиймати 5,5 миллион сомдан (810 млн сўм) ошади.

Билдирилишича, ҳозирда суд-кимёвий экспертизалари тайинланган, жиноий гуруҳнинг бошқа иштирокчиларини аниқлаш ва контрабанда каналларини фош этиш бўйича тезкор чора-тадбирлар олиб борилмоқда. Ҳибсга олинган шахслар вақтинчалик сақлаш изоляторига жойлаштирилган.

Эслатиб ўтамиз, аввалроқ “Наманган-Андижон” йўналишида ҳаракатланган Cobalt русумли автомашина Андижон шаҳрида тўхтатилиб, кўздан кечирилганда, унда йўловчи сифатида кетаётган Қирғизистон фуқароси, муқаддам гиёҳвандлик воситалари савдоси билан боғлиқ жинояти учун судланган шахсга тегишли 1 килограмм 702 грамм “гашиш” моддаси борлиги аниқланиб, процессуал тартибда расмийлаштириб олинган эди.