Уруш кескинлашди: АҚШ Эронга янги зарбалар берди (видео)

АҚШ Марказий қўмондонлиги Президент Дональд Трамп кўрсатмасига биноан Эрондаги бир нечта нишонларга қарши “ўзини ҳимоя қилиш мақсадида қўшимча зарбалар” берила бошланганини маълум қилди.

Ҳарбийлар баёнотида ушбу ҳужумлар Эроннинг “асоссиз ва давом этаётган тажовузи”га жавоб экани таъкидланган.

АҚШ Мудофаа вазири Пит Ҳегсет Марказий қўмондонлик шу кеча фаол ҳаракат олиб боришини айтган.

“Президент Трамп Эронга кучли зарба беришимизни айтди ва биз буни амалга оширамиз”, деган Ҳегсет.

Унинг таъкидлашича, Эрон ҳали ҳам музокаралар йўлини танлаши ёки можаронинг янада кескинлашишига сабаб бўлиши мумкин.

10 июнь куни “Mehr” агентлиги Эрон Ислом инқилоби қўриқчилари корпуси мамлакатнинг Жам шаҳри устида АҚШнинг MQ-9 Reaper учувчисиз қурилмасини уриб туширганини хабар қилган.

Шу куни кечқурун Трамп музокараларда сезиларли силжиш бўлмаётгани ва АҚШнинг Apache жанговар вертолёти йўқ қилингани ортидан Эронга қарши бомбардимонларни қайта бошлаш ниятида эканини билдирган. Вертолёт 8 июнь куни Уммон соҳиллари яқинида ҳалокатга учраган, унинг икки учувчиси қутқариб қолинган.

Эрон Президенти Масъуд Пезешкиён мамлакат “қатъий туришини” маълум қилиб, АҚШ таҳдидларини қоралаган.

“Axios” нашри манбаларига кўра, Трамп миллий хавфсизлик бўйича амалдорлар билан йиғилиш ўтказган. Муҳокама қилинаётган вариантлардан бири — Эронга қарши кўлами катта, аммо қисқа муддатли ҳарбий операция бошлашдир. Унинг асосий мақсади Теҳронни музокаралардаги позициясини ўзгартиришга мажбур қилишдан иборат.

Эслатиб ўтамиз, аввалроқ Дональд Трамп Эрон ядровий келишув бўйича музокараларни чўзиб юборганини айтиб, Теҳрон “бадал тўлашига тўғри келиши”ни билдирганди.