“Ўртакаш”лар Россия-Украина музокарасини муҳокама қилди

Туркия Ташқи ишлар вазири Ҳоқон Фидан ва АҚШ давлат котиби Марко Рубио телефон орқали мулоқот қилиб, Истанбулда бўлиб ўтган Россия ва Украина ўртасидаги музокараларнинг натижаларини муҳокама қилди. Бу ҳақда Туркия Ташқи ишлар вазирига таяниб, “Anadolu” хабар берди.

ТИВ вакилларининг сўзларига кўра, суҳбат давомида томонлар урушни тўхтатишга қаратилган саъй-ҳаракатлар ҳамда 2 июнь куни Истанбулда ўтган музокараларнинг натижалари юзасидан фикр алмашган.

Иккинчи раунддаги музокараларда Туркия ТИВ раҳбари Фидан бевосита иштирок этган. У учрашувни “конструктив муҳитда ўтди” деб баҳолаган ҳамда томонларнинг урушни тугатишга бўлган ёндашувини “олқишга лойиқ” деб атаган.

Шунингдек, томонлар Сурия ва Ғазодаги сўнгги вазиятларни ҳам кўриб чиққан. Фидан ва Рубио икки давлат ўртасидаги дипломатик алоқаларни мустаҳкамлаш борасида якдил фикрга келган.

Нашрнинг қўшимча қилишича, ушбу телефон мулоқоти минтақавий барқарорлик ва тинчлик йўлида муҳим қадамларга ҳисса қўшиши кутилмоқда. Шунингдек, икки мамлакат ўртасида ҳамкорликни кенгайтириш ва умумий манфаатларни ҳисобга олиш масалаларида келишувга эришилган.

Истанбулдаги музокаралар

Жорий йилнинг 2 июнь куни Истанбулда Россия ва Украина ўртасида тўғридан тўғри музокараларнинг иккинчи босқичи бўлиб ўтди. Музокаралар 16 майда уч йилдан ортиқ танаффусдан сўнг қайта тикланган. Томонлар тинчликка эришиш бўйича меморандум лойиҳаларини алмашди. Россия ҳужжатида 30 кунлик ўт очишни тўхтатиш йўллари кўзда тутилган, Украина эса ҳужжатни ўрганиш учун вақт сўраган.

Шунингдек, тарафлар оғир ярадор ва ёш ҳарбий асирлар алмашинуви бўйича келишган. Ҳар бир томон мингдан кам бўлмаган асирни топширади.

Россия, шунингдек, бир томонлама тарзда 6 минг нафар ҳалок бўлган украин ҳарбийсининг жасадини топширишга ваъда берган. Украина делегацияси раҳбари, Мудофаа вазири Рустам Умаров ҳам жасадлар “6000 га 6000” нисбатида алмашилишини маълум қилган. Украиналик болаларни қайтариш масаласи ҳам муҳокама қилинган.

Бундан ташқари, Россия жанг майдонида ҳалок бўлган аскарлар жасадини йиғиб олиш учун 2-3 кунлик ўт очишни тўхтатишни таклиф этган. Россия делегацияси раҳбари Владимир Мединский буни об-ҳаво иссиқлиги ва эпидемиялар хавфи билан изоҳлаган. Зеленский эса бундай таклифни танқид қилиб, “ўлмаслик учун ўт очишни тўхтатиш керак” деган.

Хуллас, Москва ва Анқара кеча бўлиб ўтган музокараларнинг иккинчи босқичини ижобий баҳолади. Киев учинчи босқич учрашувини июнь ойи охиригача ўтказишни таклиф қилмоқда.