UNICEF Ўзбекистонда болалар ва аёлларга нисбатан зўравонликни тўхтатишга чақирди

UNICEF Ўзбекистонда болалар ва аёлларга нисбатан зўравонликни тўхтатиб, жамиятнинг бундай ҳолатларга муносабатини ўзгартиришга чақирди. Бу ҳақда ташкилот сайтида маълум қилинди. 

Қайд этилишича, ижтимоий тармоқларда  Ўзбекистонда аёллар ва болаларга нисбатан зўравонлик акс эттирилган бир қанча видеолавҳалар тарқалганидан сўнг, ташкилот  одатий ҳол бўлиб кўринган бундай ҳодисалардан хавотир билдирган: жумладан, гўдакнинг жамоатчилик олдида калтакланиши. 

“Аёллар ва болалар, айниқса, қизлар ҳар куни зўравонликдан азият чекмоқда ва бунга, афсуски, “оила ичидаги” можаро деб қаралади. Зўравонлик ҳолатларининг олдини олиш мумкин. Зўравонликка барҳам беришда ҳар бир кишининг ўрни бор. Одамларнинг зўравонликка муносабатини ўзгартириш, жазосиз қолишга чек қўйиш, ижобий тарбия меъёрлари ва амалиётини тарғиб қилиш, жабрланганларга малакали ёрдам кўрсатиш зарур”, дейди ташкилотнинг Ўзбекистондаги ваколатхонаси раҳбари Мунир Мамадзода.

Шунингдек, ташкилот Ўзбекистонни кўрилган барча чора-тадбирлар билан бир қаторда, ижтимоий ишчилар институтини яратиш ва бутун жамиятни ушбу муаммони тизимли ҳал қилиш учун сафарбар қилишга чақирган. 

Эслатиб ўтамиз, ўтган ҳафта ижтимоий тармоқларда аёллар ва чақалоқни калтаклаш билан боғлиқ видеолавҳалар тарқалди ҳамда кўплаб муҳокамаларга сабаб бўлди. Хусусан, Сурхондарё вилояти Узун туманида бўлиб ўтган никоҳ тўйи маросимида куёв ўйинда ютқазгани учун келинни калтаклади. Ушбу ҳолат ҳолат хорижий ОАВнинг ҳам эътиборини тортмасдан қолмади. 

Шунингдек, бир аёл чақалоғини ухламагани учун аёвсиз калтаклагани ҳам жамоатчилик эътиборига тушди. 

Айтиш жоизки, бундай ҳолатлар Ўзбекистон деярли ҳар куни учрайди. Аёлларга, болаларга нисбатан муштумзўрлик одатий ҳолга айланиб қолган гўё.