Улар оч ва баҳорга бормай қирилиб кетади

Керакли маблағ билан таъминланган шошилинч, келишилган чора-тадбирларсиз афғонистонлик болаларнинг кўпчилиги баҳорга етиб бора олмайди. Бу ҳақда UNICEF халқаро болалар ташкилотининг Афғонистондаги вакили вазифасини бажарувчи Абдул Қодир Муссе огоҳлантирди, деб хабар берди БМТ Матбуот хизмати. 

Сурункали тўйиб овқатланмаслик, Афғонистондаги соғлиқни сақлаш ва асосий хизматларнинг узилиши ва бошқа омиллар афғон болалари ўртасида касалликларнинг кўпайишига олиб келди. 

Вазиятни пандемия, қурғоқчилик ва мамлакатдаги мисли кўрилмаган озиқ-овқат инқирози оқибатлари янада оғирлаштирмоқда. 

Жамғарма ходимлари Афғонистондаги гуманитар вазиятнинг ёмонлашуви, айниқса, болалар ўртасида хавфли юқумли касалликларнинг авж олиши билан кечаётганини таъкидламоқда. 

Кичкина афғонлар очлик, қизамиқ, безгак ва пневмонияга дуч келмоқда. 

2021 йилда болалар ўртасида қизамиқ билан касалланганлар сони 66 мингдан ошган. Диарея, безгак ва данг эпидемиялари қайд этилган, 1-турдаги ёввойи полиовируснинг тўртта ҳолати тасдиқланган. 

Ҳозирда мамлакатда қишнинг оғир об-ҳаво шароити мавжуд, кўплаб ҳудудларда ҳарорат аллақачон нолдан сезиларли даражада паст ва бу, мос равишда, пневмония ва ўткир респиратор касалликларга олиб келди. Кўпгина афғон оилалари уйларини иситиш учун ҳеч нарсаси йўқ, совуқ уйларда яшайди. 

Тоғли ҳудудлардан келган болалар энг катта хавф остида эди. Улар зудлик билан қишки кийим-кечак, ёпинчиқ ва уйларини иситиш учун ёқилғига муҳтож. Афғонистонда бугунги кунда беш ёшгача бўлган болалар ўлимининг тахминан 25-30 фоизи нафас йўллари инфекциялари билан боғлиқ, ўлимнинг 90 фоизи пневмония билан боғлиқ. 

Шу ой бошида UNICEF донорларни Афғонистондаги 24 миллиондан ортиқ аҳолига, уларнинг ярмини болаларга ёрдам бериш учун 2 миллиард доллар ажратишга чақирди.