Украинадаги урушда фақат Путин айбдор эмас – Генри Киссинжер

Россиянинг Украинага бостириб киришини оқлаб бўлмасада, уруш НАТО аъзолари ўртасида Украинани альянсга қабул қилиш имконияти ҳақидаги биринчи мунозарадан кейинги воқеалардан бошланди. Бу ҳақда АҚШ собиқ давлат котиби Генри Киссинжер “Die Zeit” нашрига берган интервьюсида айтиб ўтган.

“Барча айб Путинда деб ўйламайман, урушнинг ўзи жуда шафқатсиз, ҳужум қайтарилиши керак, мен Украина ва Ғарб қаршиликларини қўллаб-қувватлайман. Аммо 2014 йилда ёзган эссейимда мен Украинани НАТОга таклиф қилиш режасига жиддий шубҳа билдиргандим. Бу уруш билан якунланган бир қатор воқеаларга сабабчи бўлди. Ушбу ҳолат босқинни оқламайди, лекин мен собиқ Шарқий блокдаги барча давлатларнинг НАТОга кириши, Украинага ҳам НАТОга қўшилиш таклифини бирлаштириш мантиқсиз бўлишига ишонардим ва ҳозир ҳам ишонаман”, дейди Киссинжер.

Шунингдек, у ўшанда Украина учун нейтрал мақом қолдиришни, мамлакатни икки томон ўртасидаги кўприкка айлантиришни таклиф қилганини эслатиб ўтган.

Собиқ давлат котибининг ишонч билдиришича, энди Украина уруш тугаганидан кейин Шимолий Атлантика иттифоқига қабул қилиниши керак.

“Энди НАТО ва Россия ўртасида нейтрал зоналар йўқлиги сабабли, Ғарб Украинани НАТОга қабул қилгани маъқул. Бу уруш тугаганидан кейин ёки тинчлик келишуви натижасида яна пайдо бўлиши мумкин бўлган можароларни Россия ёки Украинанинг бир томонлама ҳужумлари билан ҳал қилиб бўлмаслигини таъминлайди”, деб тушунтирган Киссинжер.

Маълумот учун, Генри Киссинжер америкалик давлат арбоби, дипломат ва халқаро муносабатлар бўйича мутахассис ҳисобланади. Унинг “World Order” (Жаҳон тартиби) ва “Diplomacy” (Дипломатия) номли китоблари дунёда машҳур.