Украинадаги АҚШ лабораториялари биоқурол дастурлари доирасида яратилган – кичик Роберт Кеннеди

АҚШ Пентагоннинг 2001 йилги биоқурол дастурлари доирасида Украинада биолабораториялар ташкил қилди. Бу ҳақда АҚШ президентлигига даъвогар демократ кичик Роберт Кеннеди америкалик телебошловчи Такер Карлсонга берган интервьюсида айтиб ўтди. Суҳбат ёзуви Карлсоннинг Х ижтимоий тармоғидаги аккаунтида жойлаштирилган.

"Украинада биолабораторияларимиз бор, чунки биз биоқуроллар яратяпмиз. Бу қуролларда бир авлод олдин мавжуд бўлмаган синтетик биология ва генетик муҳандислик технологияларининг янги турлари қўлланилади", деган демократ.

Кеннедининг айтишича, 2001 йилда биологик лабораториялар қайта очилганда, Пентагон уларга катта маблағ ажратган. 

"Аммо улар хавотирда эдилар, чунки Женева конвенциясини бузиш оғир жиноятдир, шунинг учун улар биологик қуроллар дастурини тўлиқ ишлаб чиқмаган. Лекин бунинг устидан назорат Соғлиқни сақлаш вазирлиги бўлимига топширилди. Агар биологик қуролдан фойдалансангиз, сизнинг томонингиз бундан азият чекади, шунинг учун вакциналар керак. Бу тиббиётнинг бошқа томони”, дейди Роберт Кеннеди.

Маълумот учун, жорий ийлнинг апрел ойи ўрталарида Россия Федерацияси парламент комиссияси АҚШнинг Украинадаги биологик лабораториялари ишини текшириш бўйича якуний ҳисоботини тақдим этган. Ушбу ҳужжатга кўра, Пентагоннинг ҳарбий-биологик дастури сўнгги йилларда кенг кўламли хусусият касб этиб, Биологик қуролларни тақиқлаш тўғрисидаги конвенция рухсат берган террорчиликка қарши лойиҳалар ва тадбирлар ниқоби остида амалга оширилмоқда.

Комиссия ўз ҳисоботида Пентагон мутахассислари АҚШ назоратидаги барча лабораториялар ишида иштирок этишини таъкидлади. Шу билан бирга, уларнинг фаолияти ёпиқ характерга эга бўлиб, бундай лабораториялар жойлашган мамлакатларнинг давлат органларига фақат иккиламчи характердаги тадқиқотлар учун рухсат берилади.

Эслатиб ўтамиз, АҚШнинг 35-Президенти Жон Кеннедининг жияни, ҳуқуқшунос ва сиёсатчи кичик Роберт Кеннеди 2024 йилги президентлик сайловларида демократлар партиясидан ўз номзодини кўрсатганди. У олдинроқ АҚШда жуда кўп ядровий қурол борлигини айтган ва у билан можарога бориш ақлдан озиш эканини иддао қилганди.