Украинада асирга тушган хитойликлар қандай урушга бориб қолганини айтди

Жорий йилнинг 4 ва 5 апрель кунлари Украина Қуролли кучлари томонидан асирга олинган Хитой фуқаролари Ван Гуанцзюнь ва Чжан Ренбо Россия армияси таркибида урушмоқчи бўлмаганини, бироқ алданиб, фронтга юборилганини маълум қилди. Улар, шунингдек, ўзларининг Пекин ҳукумати билан ҳеч қандай алоқаси йўқлигини таъкидлаган. Бу ҳақда улар кеча, 14 апрель куни Украина Хавфсизлик хизмати томонидан ташкил этилган матбуот анжуманида сўз очди.

Гуанцзюннинг сўзларига кўра, у коронавирус пандемияси даврида ишсиз қолганидан сўнг иш излай бошлаган. У россиялик ёлловчи билан ярадор ҳарбийларга реабилитолог сифатида хизмат қилиш бўйича келишувга эришган. Бироқ Россияга етиб борганидан сўнг у тўғридан тўғри армия таркибига тушиб қолган ва бошқа танлови бўлмаган. Уч кундан сўнг эса фронт чизиғига юборилган. Унга кўра, айниқса TikTok’да ҳарбийларнинг образи идеаллаштирилгани боис Хитойда кўплаб эркаклар урушга боришга интилмоқда.

Унинг айтишича, рекрутерлар билан фақат имо-ишоралар орқали мулоқот қилишга мажбур бўлган, шартнома шартлари ёки тўловлар ҳақида тўлиқ маълумот берилмаган. Ҳужжатлар ҳам хитой тилида тақдим этилмаган. Якунда Гуанцзюнь ватандошларини россияликларга ишонмасликка чақирган ва Россияни “кўринганидек қудратли эмас”, Украинани эса “кутилганидек заиф эмас” деб атаган. 

Чжан Ренбо эса дастлаб Россияга сайёҳ сифатида борганини айтган. Бироқ кейинчалик бироз пул топиш ниятида бўлган. Унга Россияда қурувчи бўлишни таклиф қилишган, аммо кейинчалик ҳаммаси бошқача йўналишга ўзгариб кетган. Ренбонинг айтишича, урушга боргунига қадар Украинага оид барча маълумотлар фақат Россия ғалабалари ҳақида бўлган.

Унга 80 мингдан 260 минг рублгача маош ваъда қилинган. Бироқ у 200 минг рубль туширилган банк картасини олганидан сўнг рус ҳарбийлари дарҳол унинг телефонини олиб қўйишган ва пулни ўзлаштиришган. Улар, шунингдек, унга таҳдид қилишган.

Иккала асир ҳам Украина ҳарбийларидан биронтасини ҳам ўлдирмаганини, фронтдаги иштироклари қисқа бўлганини айтган. Асирларнинг тахминича, улар Россиянинг 7-мотострелкали бригадаси сафида бўлган. Гуанцзюнь ҳам, Ренбо ҳам ватанга маҳбуслар алмашинуви орқали қайтиш истагини билдирган. 

Эслатиб ўтамиз, аввалроқ ўтган ҳафтада Украина Президенти Владимир Зеленский Россия армиясида камида 155 нафар хитойлик ёлланганини айтганди. Унинг сўзларига кўра, уларнинг ҳар бири бўйича Киевда маълумотлар мавжуд. Хитой фуқаролари Москвага борганидан сўнг 3-4 кун тиббий текширувдан ўтказилади, миграцион карталар ва “Мир” банк карталари берилади, сўнгра улар 1-2 ой давомида ўқув марказларида тайёргарлик кўради.  

Зеленский Украина асирларига алмашиш шарти билан хитойликларни қайтаришга тайёрлигини билдирган. Хитой Ташқи ишлар вазирлиги эса ўз фуқароларининг Россия томонида урушаётганини рад этмоқда.