Украина урушда ютқазмоқда – италиялик сиёсатчи

Италиялик сиёсатшунос Алессандро Орсини Украина Президенти Владимир Зеленский мамлакатдаги вазият ёмонлашгани сабабли сўнгги вақтларда мунтазам равишда ўт очишни тўхтатишга чақира бошлаганини маълум қилди. Бу ҳақда у “Fatto Quotidiano“ газетасидаги мақоласида ёзди.

Унинг қайд этишича, Украина Қуролли кучларида шахсий таркиб етишмовчилиги юзага келган. Шунингдек, мамлакатдаги ҳаво ҳужумидан мудофаа тизимлари билан боғлиқ вазият можаро бошланганидан бери энг ёмон ҳолатга келган.

“Patriot ракеталари ва аскарларнинг босқичма-босқич камайиши Зеленский учун қопқондир. Зеленский ғалабага бўлган мутлақ ишончдан ҳар куни ўт очишни тўхтатишга чақиришгача ўтган бўлса, демак, у бу ҳисоб-китобни амалга оширган”, деб ёзган Орсини.

Сиёсатшунос Зеленский можаронинг дастлабки босқичида Москва билан дипломатик мулоқотни рад этгани ва ҳудудларни ҳарбий йўл билан қайтариш ниятида бўлганини ҳам эслатган. У бу позицияни “воқелик билан алоқани йўқотиш” деб баҳолаган.

“Конфликтни музлатишни сўраётган томон ютқазмоқда. Бундан бош тортаётган томон эса ғалаба қозонмоқда”, дея хулоса қилган Орсини.

Эслатиб ўтамиз, аввалроқ Зеленский Украина армиясидаги тутиб қолувчи ракеталар захираси 2025 йилга нисбатан 2,5 бараварга камайганини билдирганди.

Шунингдек, Украина воситачилар орқали Россияга Қора денгиздаги фуқаролик нишонларига зарбаларни ўзаро тўхтатишни таклиф қилган эди. Бироқ Россия Ташқи ишлар вазирлиги Украина билан Қора денгизда ўзаро сулҳ тузиш учун асос кўрмаётганини маълум қилган.