Украина Туркиядан 70 та ATACMS баллистик ракетасини сотиб олмоқчи

Киев Туркиядан АҚШда ишлаб чиқарилган 70 та ATACMS баллистик ракета, 12 та M270 ракета қурилма ва кассета ўқ-дориларини сотиб олмоқчи. Бу ҳақда АҚШ Давлат департаментининг Конгрессга юборган ҳужжатида қайд этилди.

Маълум қилинишича, АҚШ Давлат департаменти мазкур қуролларни Туркиядан Украинага етказиб беришга рухсат беришга тайёрлигини билдирган.

Унга кўра, режалаштирилаётган қурол-яроғ пакети таркибига 70 та M39 ATACMS оператив-тактик ракетаси, 12 та M270 MLRS ракета қурилмаси, 2,5 мингдан ортиқ бошқарилмайдиган M26 ракеталари ҳамда 47 минг дона 203 миллиметрли кассета артиллерия снаряди киради.

Етказиб беришларнинг умумий қиймати тахминан 280 миллион долларга баҳоланмоқда. ATACMS ракеталарининг дастлабки қиймати эса қарийб 28 миллион долларни ташкил этади.

АҚШда ишлаб чиқарилган қуролларни Туркия захираларидан учинчи давлатга топшириш учун Вашингтоннинг розилиги талаб этилади. Давлат департаменти тегишли ҳужжатларни жорий йилнинг 3 август куни Конгрессга тақдим этган.

Конгресс ҳужжатларни кўриб чиқиш учун 15 календарь кун муддатга эга. Агар шу вақт ичида Вакиллар палатаси ва Сенат битимни блоклаш тўғрисида қўшма резолюция қабул қилмаса, АҚШ ҳукуматининг реэкспортга берган розилиги автоматик равишда кучга киради.

Шу билан бирга, АҚШ Вакиллар палатаси жорий йилнинг 31 августигача, Сенат эса 14 сентябргача таътилда бўлади.

Давлат департаменти ҳужжатларида қуролларни Украинага топшириш АҚШнинг хавфсизлик соҳасидаги мақсадларига мос келиши қайд этилган. Туркия эскирган қурол-яроғ захираларини қисқартириб, ресурсларини армияни модернизация қилишга йўналтирмоқчи. Украина эса ушбу қуроллар орқали ўзининг ўт очиш салоҳиятини кучайтиришни мақсад қилган.

Қуролларни Украинага етказиб бериш Туркиянинг MKE AS, ASFAT ва ARCA Savunma, Болгариянинг VTIC International ҳамда АҚШнинг Pansophico ва Patriot Defense Group хусусий компаниялари орқали амалга оширилиши режалаштирилган.

Маълумот учун, ATACMS (Army Tactical Missile System) – “ер-ер” синфидаги баллистик ракета бўлиб, 300 километргача масофадаги нишонларни уриши мумкин. У GPS орқали тузатиб бўлмайдиган инерциал бошқарув тизимига эга. Ракетанинг 560 килограмм оғирликдаги кассета жанговар каллаги 950 та M74 субўқ-дорисини ўз ичига олади.

Ҳозирда АҚШ армияси ATACMS ракеталарини замонавийроқ Precision Strike Missile тизимлари билан алмаштирмоқда. Ушбу ракеталар 500 километргача масофадаги нишонларни йўқ қила олади.

Эслатиб ўтамиз, аввалроқ Украина Президенти Владимир Зеленский Пхеньян Россия ҳудудига иттифоқчисини қўллаб-қувватлаш учун 30 – 50 минг нафаргача Шимолий Корея ҳарбийлари юборилиши режалаштирилганини айтганди.