Украина Трамп учун “янги Афғонистон”га айланиши мумкин – ОАВ

Украина можароси АҚШ Президенти Дональд Трамп учун аввалги президент Жо Байденнинг Афғонистондаги инқирозига ўхшаш синовга айланиши мумкин. Бу ҳақда “Bloomberg” хабар берди.

Гарчи АҚШнинг Украинадаги иштироки 20 йиллик Афғонистон кампаниясидан фарқ қилса-да, нашр Трамп билан боғлиқ айрим ўхшашликларни кўрсатмоқда. Энг катта сабаб сифатида муаммонинг ечими мураккаб бўлиб бораётгани ва можаро чўзилган сари унинг натижалари учун айнан Трамп жавобгар бўлиб қолиш эҳтимоли ортаётгани кўрсатилган.

Нашр, шунингдек, Трампнинг Украинадаги вазиятга чуқурроқ аралашуви “Американи яна буюк қиламиз” ҳаракатига мансуб тарафдорлари орасида норозиликни келтириб чиқариши мумкинлигини ёзган. Бироқ агар у Россия ҳаракатларига нисбатан пассив позицияда қолиб, Украинани қўллаб-қувватлашни кучайтирмаса, унга етарлича ҳаракат қилмаганлик учун танқидлар ёғилиши ҳам мумкин.

Маълумот учун, 2021 йилнинг августида “Толибон” Афғонистон ҳукумат кучларига қарши ҳужумларини кучайтирган ва 15 август куни Қобул шаҳрига кириб, урушнинг якунланганини эълон қилган эди. Сўнгги икки ҳафта давомида Ғарб давлатлари фуқаролари ҳамда улар билан ҳамкорлик қилган афғонларнинг Қобул аэропорти орқали шошилинч эвакуацияси амалга оширилган. Ушбу аэропортни АҚШ ҳарбийлари қўриқлаб турган эди.

2021 йил 31 август тонгида АҚШ қўшинлари Қобулни бутунлай тарк этиб, мамлакатдаги 20 йиллик ҳарбий иштирокига нуқта қўйган. Кўплаб америкалик сиёсатчилар бу чиқишни “шармандали қочиш” деб баҳолаган эди.