Украина собиқ бош вазири депутатларни сотиб олишда айбланмоқда (видео)

Украина Миллий коррупцияга қарши бюроси (УМКБ) ва Махсус коррупцияга қарши прокуратура (МКП) Олий Рада фракцияларидан бирининг раҳбарига нисбатан “ноқонуний манфаат таклиф қилиш” моддаси бўйича айблов эълон қилди. Коррупцияга қарши органларнинг матбуот баёнотида гумонланувчининг исми келтирилмаган, бироқ МКП матбуот котиби Ольга Постолюк РБК-Украинага бу Юлия Тимошенко – Украинанинг собиқ бош вазири ва “Батькивщина” фракцияси раҳбари эканини маълум қилди.

Тимошенкога мансабдор шахсларга ноқонуний манфаат таклиф қилиш (Украина Жиноят кодексининг 369-моддаси 4-қисми) бўйича айблов қўйилган. Ушбу модда бўйича максимал жазо – 10 йилгача озодликдан маҳрум этиш. МКП ва УМКБ ушбу иш доирасида, шунингдек, муайян қонун лойиҳалари бўйича овоз бериш эвазига пул олган бўлиши мумкин бўлган бошқа фракциялардаги қарийб 20 нафар Рада депутатини ҳам текширмоқда.

Кеча, 13 январь оқшомида УМКБ ва МКП ходимлари Киевдаги “Батькивщина” партияси офисида тинтув ўтказган. Тергов версиясига кўра, 2025 йил декабрь ойида УМКБ ва МКП депутатларни пора билан сотиб олиш ҳолатларини аниқлаганидан сўнг, Тимошенко айрим халқ депутатлари билан овоз бериш чоғида содиқ хатти-ҳаракат эвазига ноқонуний манфаат беришнинг тизимли механизмини жорий этиш бўйича музокараларни бошлаб юборган.

“Гап бир марталик келишувлар ҳақида эмас, балки олдиндан тўловлар назарда тутилган ва узоқ муддатга мўлжалланган мунтазам ҳамкорлик механизми ҳақида борган”, дейилади хабарда.  

УМКБ, шунингдек, Тимошенко ва депутатлар ўртасида Радада овоз бериш учун тўлов масаласи муҳокама қилинган, деб даъво қилинаётган суҳбат ёзувини эълон қилди. Эълон қилинган аудиоёзувга кўра, депутатларга Украина хавфсизлик хизмати раҳбари лавозимидан Василий Малюкни озод этиш, шунингдек, Рақамли трансформация вазири Михаил Фёдоров ва Мудофаа вазири Денис Шмигални ишдан бўшатиш бўйича овоз бериш юзасидан кўрсатмалар берилган. Ёзувда аёл овози: “Энди кадрлар масаласига келсак. Биз лавозимдан олиш учун овоз берамиз ва тайинлаш учун овоз бермаймиз. Ҳаммаси бўйича”, дейди. Ёзувда овоз бериш учун тўлов масаласи ҳам муҳокама қилинади.

“Биз икки сессия учун “ўн” тўлаймиз, икки сессия учун обуна тарзида тўлаймиз. Агар бугун келишиб олсак, кимлар сиз билан эканини белгилаб оламиз – сизми ёки сиз билан бирга кимлар бўлса ва мен сизларга бериб бораман. Ва кассага берилгандек бераман”, дейди аёл овози.

УМКБ эълон қилган видеода терговчилар юзи кўрсатилмаган аёл олдига доллар пачкаларини қўйиб чиқаётганини кўриш мумкин.

Тимошенко барча айбловларни рад этмоқда. У ижтимоий тармоқлардаги саҳифаларида партия офисида ўтказилган “гўёки шошилинч тергов ҳаракатлари” тун бўйи давом этганини ёзди. Унинг сўзларига кўра, 30 нафардан ортиқ қуролланган эркак “ҳеч қандай ҳужжат кўрсатмасдан бинони деярли эгаллаб олиб, ходимларни гаровда ушлаб турган”. У коррупцияга қарши органларда ҳеч қандай далил йўқлигини таъкидлаб, тинтувни “улкан PR-акция” деб атаган. Тимошенконинг айтишича, УМКБ ва МКП ходимлари унинг иш телефонлари, ҳужжатлари ва шахсий жамғармаларини олиб кетган, “улар ҳақидаги маълумотлар тўлиқ тарзда расмий декларацияда акс эттирилган”.

“Мен барча бу бемаъни айбловларни қатъиян рад этаман. Кўринишидан, сайловлар ўйланганидан ҳам яқинроқ. Кимдир рақибларни тозалашни бошлашга қарор қилган. Бу менга қарши биринчи сиёсий буюртма эмас. Таъқиб ва террор – кўп йиллардан бери менинг кундалик ҳаётим. Мен аллақачон ҳеч нарсадан қўрқмайман, чунки ўзим, одамлар ва Украина олдида ҳалол эканимни биламан. Мени ҳеч ким синдира олмайди ва тўхтата олмайди. Бу сафар ҳам ҳақиқатни яна исботлаймиз”, дейди Тимошенко.

Эслатиб ўтамиз, 2025 йил ноябрь ойининг охирида Украина Миллий аксилкоррупция бюроси ва Ихтисослаштирилган аксилкоррупция прокуратураси ҳукумат маҳалласида Президент девони раҳбари Андрей Ермакка тегишли жойларда тинтувлар ўтказган эди. Кўп ўтмай, Украина Президенти девони раҳбари Андрей Ермак истеъфога ариза бергани маълум бўлди. Ермакнинг истефоси Зеленский Президентлиги давридаги энг йирик коррупция можароси авж олаётган бир пайтга тўғри келди. Бу можарода Президентнинг яқин атрофидаги шахслар иштирок этган. Ой бошида Украина Миллий коррупцияга қарши бюроси давлатга қарашли “Энергоатом” компаниясидаги коррупция схемаси бўйича саккиз нафар гумонланувчига айб қўйди. Терговчилар бу схема раҳбари сифатида Зеленскийнинг энг яқин иттифоқчиларидан бири Тимур Миндични кўрсатди.