Украина рус генералини ўз уйида йўқ қилди

Бугун, 17 декабрь куни эрта тонгда Россия Федерациясининг энг муҳим ва йирик генералларидан бири йўқ қилинди. Россиянинг Москва шаҳридаги портлашда мамлакат Қуролли кучларининг Радиация, кимёвий ва биологик ҳимоя қўшинлари бошлиғи генерал-лейтенант Игорь Кириллов ва унинг ҳайдовчиси ҳалок бўлди.  

Тергов маълумотлари генерал Москванинг Рязанский туманидаги тураржой биносига кираверишда турган скутерга ўрнатилган портловчи қурилма ишга туширилиши оқибатида вафот этганини кўрсатмоқда. Гап шундаки, қўлда ясалган портловчи мослама Москванинг Рязанский проспектидаги Кирилловнинг уйи ёнида турган скутерга ўрнатилган. Бугун эрталаб генерал ва унинг ёрдамчиси ўз уйига кириши арафасида скутер портлаб кетган. Портловчи қурилма маълум миқдордаги тротил қувватига эга бўлган, оқибатда уйнинг кириш эшиги ва деразалари синиб кетган, генералнинг хизмат машинаси ҳам шикастланган. Манбалар эса портловчи қурилмадаги тротилнинг массаси борасида турлича рақамлар тақдим қилмоқда. ТАСС ахборот агентлигининг манбасига кўра, мазкур қурилма қуввати тахминан 300 грамм бўлса, бошқа манбалар бу миқдорни 100 ёки 200 граммдан ортиқ бўлган дея тахмин қилмоқда.

Тергов қўмитасининг Москва шаҳри бўйича Бош тергов бошқармаси икки ҳарбий хизматчининг ўлдирилиши бўйича жиноий иш қўзғатди. Воқеа жойида терговчилар, криминологлар ва тезкор хизматлар ишлаётгани айтилди. Ҳозирда содир этилган жиноятнинг барча ҳолатларини аниқлашга қаратилган тергов ҳаракатлари ва тезкор-қидирув тадбирлари олиб борилмоқда.

Украина томони генерал ва унинг ёрдамчиси ҳалок бўлган Москвадаги портлаш ҳақида ҳозирча расман изоҳ берганича йўқ. Бироқ Украинанинг айрим Telegram-каналлари россиялик генерал урушда кимёвий қуролларни қўллаш ҳақида шахсан топшириқ бергани ва бунинг ортидан ҳарбий жиноятларда гумонланаётганини ёзмоқда. Чунки ушбу воқеадан бир кун аввал Украина хавфсизлик хизмати Кирилловни жиноий иш бўйича сиртдан гумонланувчи деб эълон қилган. Украина махсус хизмати генерал мамлакатнинг шарқий ва жанубий қисмларида тақиқланган кимёвий қуролларнинг оммавий қўлланиши учун жавобгар деб ҳисоблайди. Хусусан, Россия босқинига учраган Украинанинг жанубий ва шарқий ҳудудларида Кирилловнинг буйруғига биноан, кенг кўламли босқин бошланганидан бери 4800 дан ортиқ кимёвий қуроллар қўллангани иддао қилинади.

Генерал-лейтенант Кириллов бугун Мудофаа вазирлиги брифингида иштирок этиши керак эди. Генерал Россиянинг Украинага қарши босқини бошланганидан сўнг, мунтазам равишда журналистлар учун брифингларда нутқ сўзлаб келарди. Масалан, 2022 йилда у АҚШни Украинада чивинлар орқали тарқатиладиган вируслар тадқиқ этиладиган биолабораториялар яратишда айблаган. 2023 йилда эса АҚШ рақиб ҳарбий хизматчиларни заҳарлаш учун бундай чивинларни дронлар орқали етказишни режалаштираётгани ҳақида гапирганди. У шунингдек, Россияда парранда гриппи билан касалланиш даражаси ортганини Украинадан зарарланган қушлар миграцияси туфайли содир бўлгани иддао қилинган баёнотлари билан оммага анчагина танилган. 54 ёшли Кириллов Россия Кимёвий мудофаа ҳарбий академиясини тамомлаган. 2017 йилга қадар ушбу академияга раҳбарлик қилган. 2017 йилдан эса Радиация, кимёвий ва биологик мудофаа кучлари бошлиғи этиб тайинланган.

Юқорида таъкидланганидек, Киев ҳолат юзасидан расмий муносабат бермади. Аммо ҳозирча фақатгина расмий муносабат бергани йўқ, холос. Чунки манбалар Украина хавфсизлик хизмати Россия генералини портлатиб юборилишида ўз қўли борлигини инкор қилмагани ҳақида хабар бермоқда. Хавфсизлик хизматидаги манба бу портлатишни “махсус операция” деб атаган. Хусусан, BBC билан суҳбатлашган мазкур манба Россия қуролли кучларининг радиация, кимёвий ва биологик мудофаа кучлари бошлиғи генерал-лейтенант Игор Кириллов Украина хавфсизлик хизмати томонидан ўтказилган махсус операция натижасида ўлдирилди дея маълум қилган.  

“Кириллов ҳарбий жиноятчи ва бутунлай қонуний нишон эди. Чунки у Украина ҳарбийларига қарши тақиқланган кимёвий қуролни қўллашни буюрган. Украиналикларни ўлдирадиган ҳар бир кишини шундай шафқатсиз оқибат кутмоқда”, деган нашр суҳбатдоши.