Украина Россияга эмас, Венгрияга зарба берди – Сийярто

Венгрия Ташқи ишлар ва Ташқи иқтисодий алоқалар вазири Петер Сийярто украиналик ҳарбийлар томонидан “Дружба” нефть қувурига уюштирилган ҳужумларни Венгрия ва Словакияга қилинган бевосита ҳужум сифатида баҳолади. Бу ҳақда у “Szegedma” нашрига берган интервьюсида сўз очди.

Унинг сўзларига кўра, бу зарбалар Россияга эмас, балки айнан Венгрия ва Словакиянинг энергетик хавфсизлигига қаратилган. Сийярто Украина Президенти Владимир Зеленскийни ҳам танқид қилиб, у “очиқ, қўпол ва уялмай Венгрияга таҳдид қилганини” таъкидлаган. Вазирнинг айтишича, Зеленский Будапештнинг Украина Европа Иттифоқига киришига қарши позицияси сақланиб қолса, “Дружба” қувурига ҳужумлар давом этишини билдирган.

Қувурнинг жанубий тармоғи орқали Россия нефти Украина ҳудуди орқали Венгрия ва Словакияга етказилади. Шимолий тармоқ бўйича Польша ва Германияга оқим эса ЕИ санкциялари сабаб тўхтатилган, аммо шу йўналиш орқали Қозоғистон нефти етказиб берилмоқда.

Венгрия уч марта – 13, 18 ва 22 август кунлари Украинани “Дружба”га зарба беришда айблади. 22 августга ўтар кечаси бўлган ҳужум туфайли Венгрия ва Словакия беш кунга нефтдан маҳрум бўлди.

Эслатиб ўтамиз, аввалроқ Украина Ташқи ишлар вазири Андрий Сибига венгриялик мавқедоши Петер Сияртони Украина етакчиси Владимир Зеленскийга буйруқ бермасликка чақирганди. 

“Украина Президентига нима қилиш ва қачон гапириш кераклигини айтишнинг ҳожати йўқ. У Венгриянинг эмас, Украинанинг Президенти”, деган Сибига.