Украина Президенти офиси собиқ раҳбарига нисбатан тергов бошланди

Украина Миллий коррупцияга қарши бюроси ва Ихтисослаштирилган коррупцияга қарши прокуратураси Украина Президенти офисининг собиқ раҳбари Андрей Ермакка нисбатан тергов ҳаракатларини ўтказмоқда. Бу ҳақда “Украинская правда” нашри хабар берди.

Нашр Ермак автомобил ёнида турган пайтда туширилган бир нечта суратларни эълон қилган. Унинг атрофида фуқаролик кийимидаги шахслар ҳам бўлган.

Ермакка нисбатан тергов ҳаракатлари олиб борилаётганини “РБК-Украина” манбаси ҳам тасдиқлаган.

Украина Олий радаси депутати Ярослав Железняк ҳам Telegramʼда шу каби фото ва видеоларни жойлаган.

Шу билан бирга, Ермакка расман айблов қўйилгани ҳақида тасдиқ йўқлиги қўшимча қилинган.

Украина Президенти Владимир Зеленский 2025 йил ноябрь ойида Андрей Ермакни президент офиси раҳбари лавозимидан озод қилган эди. Бу қарор Ермак уйида тинтув ўтказилганидан кўп ўтмай қабул қилинган.

Железнякнинг иддао қилишича, Ермак энергетика соҳасидаги коррупцион схемаларга алоқадор бўлган. Бу ишлар бўйича терговни Украина Миллий коррупцияга қарши бюроси олиб борган.

Бюро ўтган кузда Украина атом электр станциялари оператори ҳисобланган “Энергоатом” компаниясидаги коррупцияни фош этиш учун “Мидас” махсус операциясини амалга оширган. Терговга кўра, схеманинг асосий ташкилотчиси бизнесмен Тимур Миндич бўлган. У аввал Зеленскийнинг бизнес ҳамкори сифатида танилган.

Кейинроқ идора Ермак уйидаги тинтувлар Миндич ишига боғлиқ эмаслигини билдирган.

Зеленский эса Ермакнинг ишдан олиниши коррупция терговлари билан боғлиқлигини рад этиб, бу қарор учун “ўзига хос сабаблар” бўлганини айтган.

Президент маъмуриятидан кетгач, Андрей Ермак адвокатлик фаолияти билан шуғулланиш ҳуқуқини тиклади ва Украина Миллий адвокатлар ассоциацияси ҳузурида ташкил этилган уруш жабрланувчиларини ҳимоя қилиш қўмитасига раҳбарлик қила бошлади.

2026 йил январидан буён Украина Президенти офисига мамлакат Мудофаа вазирлиги Бош разведка бошқармасининг собиқ раҳбари Кирилл Буданов раҳбарлик қилиб келмоқда.