Украина илк марта Россия ҳудудига ATACMS билан зарба берди
Олам
−
19 Ноябрь 19500
Украина Мудофаа кучлари биринчи марта ATACMS баллистик ракеталари билан Россия ҳудудига ҳужум қилди ва у нишонга муваффақиятли урилди. Бу ҳақда “Censor.net” интернет нашри хабар берди.
Унга кўра, зарба Брянск вилоятининг Карачев шаҳри яқинидаги ҳарбий объектга берилган.
“Ҳақиқатан ҳам, ATACMS биринчи марта Россия Федерацияси ҳудудига зарба бериш учун ишлатилган, зарба Брянск вилоятидаги объектга урилган ҳамда у муваффақиятли амалга ошган”, дейилади хабарда.
Карачев Брянскдан унчалик узоқ бўлмаган жойда ва Украина чегарасидан тахминан 130 км узоқликда жойлашган.
Карачев яқинига қилинган ҳужум ҳақида
Бугун, 19 ноябрга ўтар кечаси у ерда Россия Мудофаа вазирлигининг Ракета ва артиллерия бош бошқармасининг 67-арсеналига ҳужум уюштирилган. Ижтимоий тармоқларда кучли ёнғинлар акс этган видеолар пайдо бўлди. Миллий хавфсизлик ва мудофаа кенгаши қошидаги дезинформацияга қарши кураш маркази раҳбари Андрей Коваленконинг сўзларига кўра, арсеналда артиллерия ўқ-дорилари, жумладан, Шимолий Корея снарядлари сақланган. Бундан ташқари, бомбалар, зенит-ракеталар ва ракета тизимлари учун ўқ-дорилар мавжуд бўлган.
Бу омборга биринчи марта ҳужум қилиниши эмас. Бунгача октябрь ойида у Украина дронлари томонидан ҳужумга учраган эди. Ўшанда Украина Қуролли кучлари Бош штабининг хабар беришича, бундай зарбалар душман учун логистика муаммоларини келтириб чиқаради ва ҳужум салоҳиятини камайтиради. ATACMS бориб урилганидан сўнг, нишон ҳудудидаги арсеналда 12 та иккиламчи портлаш қайд этилган.
“Россиянинг Украинага қарши қуролли тажовузини тўхтатиш учун россияликларга тегишли ўқ-дори омборларини йўқ қилиш давом этади”, дея қўшимча қилди Бош штаб.
Эслатиб ўтамиз, аввалроқ Россия Ташқи ишлар вазирлиги агар Украина Россия ҳудудига ҳужум қилиш учун узоқ масофали ракеталардан фойдаланса, бу “АҚШ ва унинг сунъий йўлдошларининг Россияга қарши ҳарбий ҳаракатларда бевосита иштирок этишини” англатиши ҳақида баёнот берганди. ТИВга кўра, бу “можаронинг моҳияти ва табиатини тубдан ўзгартириш” деган маънони англатади.
