Украина ҳукумати Херсон мэрининг ўринбосарини ҳибсга олди

Украина ҳукумати яқинда озод қилинган Херсон мэрининг ўринбосарини Россия босқинчи кучлари билан ҳамкорликда гумон қилиб ҳибсга олди. Бу ҳақда Украина Давлат тергов бюроси маълум қилди. 

Қайд этилишича, ҳужжатда исми-шарифи кўрсатилмаган ҳоким ўринбосари ишғол қилувчи органлар билан ҳамкорлик қилиб, улар назоратидаги хизматларнинг ишлашига ёрдам берган. 

Маҳбуснинг айби исботланса, ушбу айбловлар бўйича 12 йилгача озодликдан маҳрум этилиши мумкин. Агентлик маълумотларига кўра, у ҳибсда, аммо гаров эвазига озод қилиниши мумкин. 

Февраль ойида Украинага бостириб кирган рус қўшинлари шаҳарни тарк этиб, Днепрнинг нариги томонига ўтганидан сўнг, 11 ноябрь куни Украина Херсоннинг озод қилинганини эълон қилди. Қўшинларнинг олиб чиқилиши урушдан олдин деярли 300 минг аҳолига эга бўлган Херсоннинг саккиз ойдан ортиқ руслар томонидан босиб олинишига барҳам берди. 

Рус қўшинлари шаҳарни Днепрнинг нариги томонидан тез-тез ўққа тутади. 

Украина Херсонда тартибни тиклаш муаммосига дуч келмоқда. Ўн минглаб аҳоли қочиб кетган, электр ва асосий коммунал хизматлар мавжуд эмас. Хавфсизлик кучлари ҳамкорлар ва фуқаро кийимидаги рус аскарларини қидиришда давом этмоқда.