Укарианинг Қрим кўпригига ATACMS ракетаси билан қилган ҳужуми қайтарилди – Россия

Россия кеча, 15 август куни тунда Украина Қуролли кучларининг Қрим кўпригига уюштирилган йирик ракета ҳужуми қайтарилганини эълон қилди. Бу ҳақда Россия Мудофаа вазирлиги баёнот берди.

Билдирилишича, кўприкка отилган барча 12 та ATACMS ракетаси ҳаво ҳужумидан мудофаа тизимлари томонидан уриб туширилган.

“Крымского ветра” Telegram-каналига кўра, Украина Қуролли кучларининг тунги ҳужуми туфайли Қрим кўприги тўрт соатга тўсиб қўйилган, фақат эрталабдан бошлаб ҳаракат тикланган, ҳар икки томондан 2300 га яқин автомобиль тирбандликда тўпланиб қолган.

Аннекция қилинган Қримнинг Керчь шаҳри яқинида ёнғинлар қайд этилган ва Митридатлар тоғи яқинида вайроналар бор.

Аввалроқ Россия Қора денгиз узра 5 та самолёт типидаги учувчисиз учиш аппаратлари ҳамда Қрим яримороли томон йўл олган 2 та учувчисиз катер тутиб олиниб, йўқ қилинганини билдирганди. Украина томони эса кўприкдаги ракета ҳужумига изоҳ бермаган.

Қрим кўпригининг роли

Россия Федерациясининг Украинага кенг кўламли ҳарбий бостириб кириши бошланганидан сўнг, Ғарб кузатувчилари ва ҳарбий экспертлар Қрим кўпригининг Россия Қуролли кучларини таъминлашдаги муҳим ролини бир неча бор таъкидлади. Бироқ, жорий йилнинг май ойи бошида Украинанинг OSINT агентлиги Мольфар сунъий йўлдош тасвирларини ўрганиб чиққач, Украина ҳужумлари туфайли Россия ўз қўшинларини таъминлаш учун кўприкдан фойдаланишни тўхтатганини эълон қилди.

Таҳлилчиларнинг фикрича, Россия Федерацияси Қрим кўпригидан ҳарбий мақсадларда фойдаланишдан 2023 йил 17 июлда Украина Қуролли кучларининг ер усти дронларининг ҳужуми оқибатида кўприкнинг бир неча оралиқлари вайрон бўлганидан кейин воз кечишни бошлаган.

Эслатиб ўтамиз, 2024 йилнинг апрель ойида АҚШ Конгресси Вакиллар палатаси Украинага ёрдам бериш учун алоҳида қонун лойиҳасини тақдим этганди. У 61 миллиард доллар ва ATACMS ракеталарини ажратишни назарда тутган. Шунингдек, “BRAVO Team” махсус бўлинмаси Курск вилоятининг Суджа шаҳри Украина қуролли кучлари назоратига ўтганини эълон қилганди.