UFC чемпиони Трампни танқид қилгани учун Оқ уй турниридан четлатилди

UFC ўрта вазн тоифасидаги амалдаги чемпион Шон Стрикленд АҚШ Президенти Дональд Трампни танқид қилгани учун Оқ уйда ўтказиладиган UFC тадбирига таклиф этилмаганини маълум қилди. Бу ҳақда “Championship Rounds” хабар берди. 

“Мен Биньямин Нетаньяху Трампга таъсир ўтказаётганини айтганим учун Оқ уйдан четлаштирилган ягона америкалик UFC чемпиониман. Бу шунчаки фикр эмас, бу факт”, дейди Стрикленд.

35 ёшли америкалик жангчи фаолияти давомида 31 та ғалаба ва 7 та мағлубият қайд этган. У 2023–2024 йилларда UFC ўрта вазн тоифаси чемпиони бўлган.

Жорий йилнинг 10 май куни Стрикленд БАА байроғи остида жанг қиладиган чеченистонлик Ҳамзат Чимаевни ҳакамларнинг якдил бўлмаган қарори билан мағлуб этиб, чемпионлик камарини қайтариб олган эди.

Ҳозирда Стрикленд UFC’да АҚШ шарафини ҳимоя қилаётган ягона амалдаги чемпион ҳисобланади.

Маълумот учун, Оқ уй турнири жорий йилнинг 14 июндан 15 июнга ўтар кечаси бўлиб ўтади. Мусобақанинг марказий жангида енгил вазн тоифаси чемпиони Илия Топурия ҳамда вақтинчалик чемпион Жастин Гэтжи ўзаро тўқнаш келади.

Шунингдек, франциялик Сирил Ган ва бразилиялик Алекс Перейра вақтинчалик оғир вазн тоифаси чемпионлик камари учун жанг қилади. Мазкур вазндаги амалдаги чемпион эса британиялик Том Аспиналл ҳисобланади.