UEFA, OFK va KONKAKAF FIFA faoliyatini tekshirmoqchi

Yevropa futbol ittifoqi (UEFA), Osiyo futbol konfederatsiyasi (OFK) va Shimoliy, Markaziy Amerika va Karib dengizi futbol konfederatsiyasi (KONKAKAF) FIFA prezidenti Janni Infantinoning Jahon chempionati huquqlarining bir qismini sotish taklifidan so‘ng tashkilot faoliyatini mustaqil tekshirishga chaqirdi. Bu haqda “Reuters” nashri xabar berdi.

Uch konfederatsiya futbol jamoatchiligiga ochiq maktub yo‘llab, FIFA’dagi so‘nggi voqealar yuzasidan xavotir bildirgan.

“Hurmatli futbol oilasi! Futbol dunyodagi eng buyuk umumiy ehtirosdir. U biror shaxs yoki tashkilotga tegishli emas. U futbolchilar, muxlislar, klublar, a’zo assotsiatsiyalar va kelajagi ishonib topshirilgan har bir muassasaga tegishli”,  deyiladi maktubda.

Konfederatsiyalar so‘nggi o‘n yillikdagi taraqqiyot FIFA, konfederatsiyalar, a’zo assotsiatsiyalar va futbol rivojiga hissa qo‘shgan minglab insonlarning umumiy mehnati natijasi ekanini ta’kidladi.

“Gap pulda emas. Konfederatsiyalar allaqachon FIFA’ning ulkan zaxiralaridan mas’uliyatli foydalanishga va a’zo assotsiatsiyalarni rivojlantirishga investitsiyalarni yanada kuchaytirishga chaqirgan. Gap musobaqalarni kengaytirish, Jahon chempionati mablag‘larini taqsimlash yoki boshqa jamoaviy qarorlarni qayta ko‘rib chiqish haqida emas. Bu qarorlar birgalikda qabul qilingan va ular o‘z kuchida qolishi kerak. Gap yanada fundamental narsa – futbolning yaxlitligi va uni boshqarish uchun saylanganlarning halolligi haqida”,  deyiladi murojaatda.

Konfederatsiyalar FIFA’ning yaqinda vitse-prezidentlari va 211 ta a’zo assotsiatsiyaga yuborgan xatida jarayonda xatolarga yo‘l qo‘yilgani tan olinganini qayd etdi. FIFA bu holatni kommunikatsiyadagi uzilish va futbol manfaatlarini noto‘g‘ri baholash bilan izohlagan.

Biroq UEFA, OFK va KONKAKAFning fikricha, Jahon chempionati huquqlarining bir qismini sotish taklifining o‘zi jiddiy xatoga yo‘l qo‘yilganini anglatadi. Ular buni oddiy protseduradagi xato emas, balki FIFA xizmat qilishi kerak bo‘lgan institutlarga bo‘lgan ishonchning jiddiy buzilishi, deb baholadi.

Konfederatsiyalar bunday holat yuzasidan tekshiruvni FIFA’ning o‘zi, uning xodimlari yoki futbol manfaatdor tomonlari emas, balki to‘liq mustaqil uchinchi tomon o‘tkazishi kerakligini ta’kidladi.

Shuningdek, maktubda Marokashda o‘tkazilgan rahbariyat yig‘ilishida faqat bitta saylangan vakil ishtirok etgani, FIFA Kengashi yoki a’zo assotsiatsiyalar vakillari esa yig‘ilishga taklif qilinmagani tanqid qilindi.

“Mas’uliyat bo‘lishi kerak bo‘lgan joyda sukut hukmronlik qilmoqda, ochiqlik bo‘lishi kerak bo‘lgan joyda esa masofa bor. Bu futbol o‘z rahbariyatidan kutadigan fazilatlar emas”,  deyiladi murojaatda.

Konfederatsiyalar futbol rahbariyatini futbolga buyruq berish emas, unga xizmat qilishga chaqirdi.

Maktubni UEFA prezidenti Aleksandr Cheferin, KONKAKAF prezidenti Viktor Montalyani, OFK prezidenti Salmon bin Ibrohim Al Xalifa, shuningdek, UEFA bosh kotibi Teodor Teodoridis, KONKAKAF bosh kotibi Filipp Mojo va OFK bosh kotibi Datuk Seri Vindzor Jon imzolagan.