“У мен ва МЮни қийин аҳволда қолдирди”. Тен Хаг Роналдуни танқид қилди

“Манчестер Юнайтед”нинг собиқ бош мураббийи Эрик тен Хаг “қизил иблислар” билан ишлаган даврда Криштиану Роналду жамоа учун етарлича ҳаракат қилмаганини таъкидлади. Бу ҳақда у “The Athletic” нашрига берган интервьюсида сўз очди.

Нидерландиялик мутахассиснинг айтишича, Роналду жамоа режаларида муҳим ўрин тутган. Тен Хаг ҳатто “Манчестер Юнайтед”га келишидан олдин футболчи билан учрашиш ва ўз мақсадларини тушунтириш учун Португалияга борган.

“У жамоани ҳам, мени ҳам қийин аҳволда қолдирди, чунки у бизнинг режаларимиздан ўрин олган эди. “Манчестер Юнайтед”га келишимдан олдин у билан суҳбатлашиш ва мақсадларим ҳақида гаплашиш учун Португалияга борганман. Шубҳасиз, Криштиану футбол тарихидаги энг буюк ўйинчилардан бири. Мен уни жуда ҳурмат қилардим. Аммо ўша пайтда мураббий сифатида оқилона қарор қабул қилишим ва ўзим ҳавас қиладиган футболчиларни жамоада сақлаб қолишим керак эди”, дейди нидерландиялик мутахассис.

Тен Хаг Роналду машғулотларни қолдиргани, машғулотларга келганида эса етарлича ҳаракат қилмаганини таъкидлаган.

“Роналду машғулотларни қолдириб кетарди, келганида эса етарлича югурмасди. Мен бу ҳақда унга очиқ айтганман. Унга кўп марта шундай деганман: “Ронни, ҳамма сенга қулай вазият яратиш ва керакли позицияларга чиқишинг учун ишлашга тайёр. Аммо агар жарима майдонигача етиб бора олмасанг, гол ура олмайсан”. У буни уддалай олмаётган эди”, дейди Тен Хаг.

Унинг айтишича, футболчи билан бу масалада бир неча бор очиқ гаплашган. Мураббий Роналдуга гол уриши учун жарима майдонидаги керакли позицияларга етиб бориши лозимлигини тушунтирган.

“Мен ундан прессинг қилишни талаб қилганим ва шу сабабли у ҳолдан тойгани ҳақидаги гаплар нотўғри. У шунчаки керакли позицияга етиб бора олмасди. Тўп билан ҳам, тўпсиз ҳам етарлича ҳаракат қилмасди. Бунинг сабаби – у ўзини лозим даражада тайёрламаганида эди”, дейди МЮ собиқ устози.

Шу билан бирга, нидерландиялик мутахассис ҳар бир кучли жамоа ўз юлдуз футболчиси учун қулай шароит яратиши кераклигини, аммо футболчининг ўзи ҳам жамоа манфаати учун меҳнат қилиши шартлигини қайд этган.