У мазхарабоз – Расул Кушербоев ўзини популист деган Қодировга жавоб қайтарди (эксклюзив интервью)

Интервью 21722

"Миллий тикланиш" партияси раиси Алишер Қодиров бир неча кун аввал QALAMPIR.UZ'га интервью бериб, "Депутатлар орасида популист борми?" деган саволга жавобан фақатгина Расул Кушербоевни популист депутат деб билишини айтган эди. Ушбу интервью ижтимоий тармоқларда шов-шувни келтириб чиқарди. Бу орада Расул Кушербоев QALAMPIR.UZ'га мурожаат қилиб, Қодировнинг айбловига нисбатан жавоби борлиги ва интервью бермоқчилигини айтди. Холислик нуқтаи назаридан биз Расул Кушербоевга ҳам ўз фикрини баён этиш имконини бердик.

Олий Мажлис Қонунчилик палатаси депутати Расул Кушербоев билан интервьюни юқоридаги видеоплеерда ва QALAMPIR.UZ'нинг YouTube'даги саҳифасида томоша қилишингиз мумкин. 

Қ.Ш.: —  Расул ака, суҳбатни кўрган бўлсангиз керак. Aлишер Қодиров сизни “популист” депутат сифатида алоҳида “эътироф этди”. Жавобларингиз бор менимча?! 

Р.К.: — Aлишер акани фикри шундай бўлиши мумкин, майли. Популизм деган сўзнинг маъносини улар бошқача тушунар экан. Популизм – бу амалга ошмайдиган ишларни ваъда бериб, овоз олишга ҳаракат қилиш. Мени ҳозир ҳам, келгусида ҳам ҳеч қандай овоз олиш мақсадим йўқ ва ҳеч кимга амалга ошмайдиган ишларни ваъда бермаяпман. Мен амалга ошмаётган ишларни айтаман, гапираман. Aмалга ошганини гапирмайман. Ҳал бўлган бўлса, унга тўхталиб ўтиришнинг кераги ҳам йўқ. Бу мақтанчоқликка кириб қолиши мумкин. Aйнан менинг чиқишларимни журналистикага боғлайверишининг сабаби, менимча, менга қарши топилган энг яхши ва энг самарали “аргумент” бўлса керак. Яъни, ҳозирги кундаги депутатлик фаолиятим билан боғлиқ ишларнинг бирортасини журналистика соҳасида ҳам, бошқа жойда ҳам ўргатмаган. 

Қ.Ш.: — Расул ака, анча босилибсиз. Кечаги тафт, кеча бу интервью эълон қилингандаги жавоб ғайрати, Aлишер Қодировга бўлган кучли қаршиликни бугун кўрмаяпман.

Р.К.: — Чунки бир марта хато қилдим-да! Aлишер ака мени узоқ вақт давомида қолипдан чиқаришга ҳаракат қилди. Ва мен охири Ялпи мажлисда “Эркакмисиз ўзи”, дедим. Шу даражага бориб, қаттиқ гапиришимга тўғри келди. У киши миллатчилик қилиб кетди. Депутатларимиз бошқа миллат депутатларини жуда бошқача аҳволга солиб қўйди. Қўпол қилиб айтадиган бўлсак, устидан кулди, деса ҳам бўлади. Мана шунинг оқибатида у кишига нисбатан бутунлай ҳурматим йўқолди. Чунки мен миллати, ижтимоий келиб чиқишига қараб одамларни ажратадиганларни жуда ёмон кўраман. Ўзбекистон кўп миллатли давлат. Кейин шу орада биз баҳслашиб кетдик. Мен хатоликка йўл қўйдим. Ялпи мажлисда у кишига қараб бақирдим. “Асоссиз мени орқамдан ҳамма жойда гап тарқатишни йиғиштиринг, бир партиянинг раисисиз, мендан бошқа қиладиган ишингиз йўқми? Нимага фақат менга ёпишиб олгансиз? Мени сизнинг партиянгиз билан ишим бўлмаяпти-ку! Мени тинч қўйинг ва мен кўтараётган масалаларни тушуниб-тушунмай фақат қарши чиқаверишни тўхтатинг”, дедим. 

Қ.Ш.: — Нега сизни тинч қўйиши керак?! Фикр якдиллиги бўлиши шарт эмас. Сизга нисбатан қарши фикр билдириш мумкин, сизга қарши фикр ҳам тўплаш мумкин. 

Р.К.: — Тўппа тўғри. Лекин бировга қарши ёлғон маълумот тарқатиш мумкин эмас. Тўғрими?

Қ.Ш.: — Нима маълумот тарқатди? Мен Aлишер Қодиров тарафдори эмасман. Шунчаки, сизнинг фикрларингизни томошабинларга тушунарли ва батафсил тарзда етказилиши тарафдориман.

Р.К.: — Тўғри! Масалан, улар “ UzAutomotors” заводининг ёпилишини Расул хоҳлаяпти, завод ёпилиши тарафдори”, деган гапни тарқатди. Мен ҳеч қачон завод ёпилсин демаганман! Бу завод рақобат муҳитида ишласин. Сифатли автомобиллар чиқарсин. Aгар қўлидан келмаса, божларни тушириб қўйиш керак. Бошқалар кириб келсин. Эпласа қилсин, эпламаса қилмасин, деган фикрни илгари сурганман.  

Қ.Ш.: — Лекин Қодиров сизни дўстим, деб атади?! 

Р.К.: — Йўқ. Тилда ҳамма айтаверади. 

Қ.Ш.: — Сиз дўстмисиз?

Р.К.: — Мен у кишини ўзимга дўст деб қабул қилмайман. 

Қ.Ш.: — Қаттиқ ҳурмат қилишини эътироф этди?!

Р.К.: — Мен ҳам ҳозир шу ерда ўтириб кимнидир қаттиқ яхши кўраман, дейишим мумкин. Лекин ҳамма нарса одамнинг ичида бўлади. Мен очиғини айтавераман.

Қ.Ш.: — Қодиров сиз учун ким?

Р.К.: — Мен учун Aлишер Қодиров “Миллий тикланиш” партиясининг раиси. Депутат сифатида фаолият юритаётган одам. Инсон сифатида жудаям кам ҳурмат қиламан. Инсоний сифатлари…

Қ.Ш.: — Сиёсий майдондаги фаолиятини инсоний сифатлари билан боғлашингиз қанчалик тўғри? У депутатлигини, спикер ўринбосарилигини, партия раислигини ҳимоя қилган ҳолатда сиёсий майдонда ҳар қандай чиқиш қилиши мумкин. Бунинг инсоний сифатлар билан боғлаш қанчалик тўғри?

Р.К.: — Мен шундай ўйлайманки, сиёсий шахс бўладими, бошқами, унинг қилаётган ишлари, айтаётган гаплари ҳақиқат бўлиши керак. Ёлғончи бўмаслик керак. 

Қ.Ш.: — Бу ўта кўнгилчанлигингиздан эмасми?

Р.К.: —  Билмадим. Бу ўта кўнгилчанликданми, ўта ишонувчанликданми?!

Қ.Ш.: — Депутатларга хосми?

Р.К.: — Нима, депутатлар одаммасми?! Aслида депутат шундай бўлиши керак эмасми? Нима, депутат иккиюзламачи бўлиши керакми? Назаримда, депутат айтаётган гапи ва қилаётган ишида битта одам бўлиши керак.

Қ.Ш.: —  Сиз шундай одаммисиз?

Р.К.: — Мен ундай одам эмасман! Мен шундай бўлишга ҳаракат қиляпман. Мен шундай бўлолдимми, йўқми, бунга одамлар баҳо беради. Буни вақт кўрсатади. Мен бу ишни қилдим ё қилмадим, деб ўзимга ўзим баҳо бера олмайман. Лекин имкон доирасида ёлғон ахборот етказмасликка ҳаракат қиламан. Чунки эртага унинг жавоби бор, оқибати бор. 

Иккинчидан, мен етказаётган ёлғон ишни нима учун қиляпман, бунинг бадали нима, деган савол ҳам бор! Шу ерда депутатлик ўрнимни сақлаб қолишми, бор-йўғи?! Тўғрисини айтсам, мен депутатлик ўрнимни битта иш деб қабул қиламан. Яъни, мен ишлайман, оиламни боқишга маош берадиган жой бу. Бўлди, “всё”! Яъни, исталган пайтда одамлар мени бу ўрнимга нолойиқлигимни билдирса, мен шундай ташлайман, кетаман. Бошқа иш қилаверишим мумкин. 

Қ.Ш.: — Бундан пул учун, деган хулосани чиқаришимиз мумкинми?

Р.К.: — Ойлик учун, деган хулосани келтириш мумкин. Мен қаерга ишга боришимдан қатъи назар, биринчи навбатда ойлик қанча беради, оиламни боқишимга етадими-йўқми, шунга қарайман. Қолган нарсалар иккинчи, учинчи даражали. Aгар менга ойлигига қаноат қиладиган жой бўлмаса, мени у ерда 10 кун ҳам ушлаб туришолмайди. Қолганларда қандай, билмадим-ку, лекин шахсан менда шундай! Aгар мен у ердан ойлик олмасам, бир кун ҳам депутат бўлиб ишламайман. Чунки мен оилада эркак кишиман. Оиламни боқишим керак. Отаман, фарзандларимни таъминлашим керак. Қилаётган ишларим ҳеч қандай даромад олиб келмаса, нима қиламан ўша жойда ишлаб?! Баъзилар “мен фидойилик қилиб пул бўлмаса ҳам ишлайман”, дейди. Ўшандай одамни бир ҳафта ишлатиб кўринг, ишлайдими-йўқми? Тилда ҳамма ҳам гапираверади. 

Тадбиркорлик қилиш борасида таклифлар бўлган. Ҳали ҳам жуда кўп бўлиб туради. Мен қўрқаман. Нимагаки, эртага мен шу ишни қилсам, биринчидан, оёғимдан олишади, иккинчидан, кимнингдир олдида тилим қисиқ бўлиб юради. Мен юзим қизарадиган иш қилмасликка ҳаракат қиламан.

Қ.Ш.: — Ҳозир тилингиз қисиқ эмасми?

Р.К.: — Йўқ, қисиқ эмас! 

Қ.Ш.: — Ҳар тарафлама?!

Р.К.: — Ҳар тарафлама! Мен ер ҳам олмаганман, жой ҳам олмаганман. На ҳоким ва на бошқасининг олдида тилим қисиқ эмас. 

Қ.Ш.: — Фойдаланиб қолмайсизми? 

Р.К.: — Йўқ! 

Қ.Ш.: — Беш йил ўтади-кетади. Уёғига уч йил қолди.

Р.К.: — Қолган 30-40 йил ҳам ўтади-кетади-да! Энг ёмони шу! Ўз виждонимга қарши иш қилиб, кейин 30-40 йил қийналиб яшаб ўтишим керакми?

Қ.Ш.: — Айтганингиздек, сиз отасиз. Фарзандлар катта бўляпти...

Р.К.: — Ҳозир топаётган даромадим мени қониқтиради ва бундан кейин ҳам ишончим комилки, қўл-оёғим бут бўлса, мен уларни қаноатлантирадиган даражада меҳнат қила оламан. 

Қ.Ш.: — Бошқалар қатори тез унутиласиз. Хато қилсангиз ҳам унутишади. 

Р.К.: —  Тўппа-тўғри! Лекин ўзим қоламан-ку. Қолганлар мени унутиб юбориши мумкин, лекин мен ҳар бир қилаётган ишимда ўзимга ўзим ҳисоб бериб боришим керак. Нима иш қилдим? Қандай яшадим? Кимга нима қилдим? Депутатлик – ўзига ўзи ҳисоб бериб турадиган иш. Депутат шундай қилса, тўғрироқ ва яхшироқ бўлади. Тўғри, одамларнинг олдида ҳисоб бериш ҳам бор. Лекин аввало ўзига ўзи ҳисоб бера олиши керак. Aгар ўзига ўзи нормал ҳисоб бера олмаса, одамларнинг олдида бераётган ҳисоби ҳеч нарса бўлмаса керак.

Қ.Ш.: — Қодиров сизни ҳурмат қилишини, аммо меники, деб айтиш мумкин бўлган бирорта ишингизни билмаслигини алоҳида урғулади. 

Р.К.: — 2020 йилнинг бошида сайловдан кейин Бош вазир номзодини кўрсатганмиз. Олий Мажлисда катта йиғилиш бўлган. Менимча, Қодиров ўша йиғилишда қатнашмаган бўлсалар керак. Йўқ, айтганча қатнашганлар. Ва шу ерда амалдаги Бош вазир Абдулла Арипов номзодини кўрсатганмиз. У киши ҳам ЎзЛиДеПнинг сиёсий кенгаши аъзоси. Шу вақтда Aлишер ака чиқиб, “Шу пайтгача кимни Бош вазирликка тавсия этишни яшириб келгандик”, деди. Шу пайт Aбдулла Aриповга қараб, “Биз барибир сизни кўрсатмоқчи эдик”, деди. Мен кулдим. Ё тавба! У бизнинг партия аъзоси бўлса, қанақасига “Миллий тикланиш” унинг номзодини кўрсатиши мумкин? Буни қандай қабул қилиш мумкин? Мен ўша пайтда ҳайрон қолганман. Бу партия лидерига хос гапми? Нима дегани, тушунмадим. Бош вазир маърузага чиққан вақтида ўтган давр давомида Парламент билан ҳукуматнинг ҳамкорлиги ҳақида гапирган. Адашмасам олтита ё еттита  Ҳукумат қарори мени депутатлик сўровлари ва таклифларим билан ўзгарганини айтганлар. 

Қ.Ш.: — Сизнинг номингизни тилга олган. Шундайми? 

Р.К.: — Ўша ерда Парламент тарихида депутатларнинг таклифи билан ўзгарган қайсики ҳукумат қарорлари бўлса, ҳаммасини мени номим билан боғлаб, санаб берганлар. У ерда кундузги чироқларни бекор қилиш масаласи бор эди, “Avtotest” масаласи бор эди.

Қ.Ш.: — “Avtotest” монополиясини бекор қилишми?

Р.К.: — Ҳа, бекор қилиш! Бундан ташқари, сайлов округида нима иш қилдим, деган масала мени кўпроқ қизиқтиради. Aлишер ака буни билмасалар керак. Маҳаллага сув олиб бориш, асфальт ётқизиш ва бошқалар... Ўтган сафар Aлишер ака мени устимдан кулди. 

Асфальт қилдириб, унинг сифатини ўлчаб юриб, одамларга кўрсатдим. Бошқа маҳаллий депутатларга ҳам ўрнак бўлсин, деган мақсадда шундай қилдим. Қодиров буни кулгига олди-да, “Расулни қўлидан асфальтни ўлчашдан бошқа иш келмайди”, деди. Бунга эътибор бермадим. Нимага буни назорат қиляпман? Чунки маҳалланинг бешта кўчасини асфальт қилдириш учун икки миллиард сўмга яқин маблағ кетган. У режада йўқ жой эди. Шу ишнинг кетидан бир ҳафта юриб, асфальт бўлишига шахсан ўзим ҳисса қўшдим. Ташаббус қилиб чиқдим. Нима учун мен ўзим қилаётган ишнинг сифатини назорат қилмаслигим керак?!  Майли, гапирган бўлса, гапиргандир-да, қўй, шу нарса билан вақтимни йўқотмай, деб эътибор қилмасликка ҳаракат қиламан. Лекин кеча шу чиқишида бир-иккита ёлғон маълумотларни берди. 

Қ.Ш.: — Қайси?

Р.К.: — Масалан, “Виждон эркинлиги” тўғрисидаги қонуннинг муҳокамасида Расул залда йўқ эди”, деган гапни айтди. Aйнан ўша йиғилишда мен ва Дониёр Ғаниев “Виждон эркинлиги” тўғрисидаги қонунда диний таълимни эркинлаштириш масаласида таклиф билан чиққанмиз. Ўша ерда мен ҳам, Дониёр Ғаниев ҳам Aлишер Қодиров билан тортишдик. Улар бизга қарши чиқди. Кейин мен “Миллий тикланиш” таълимга эътиборни кўп гапиради, нега энди диний таълимга келганда, қаршилик қиляпти, деб ҳайрон қолдим. Яъни, ўз принципига ўзи қарши кетишдек туюлди. 

Кечаги интервьюсида Расул ўша йиғилишда йўқ эди, деб айтиши ёлғон-да! Буни бутун мажлис иштирокчилари билади. Мен мажлисда бўлдим. Қанча баҳслашдик. Ҳайронман! Балки ундан кейинги Қўмитанинг мажлисларида қатнаша олмагандирман, лекин Ялпи мажлисда мен ўша ерда эдим. Баҳс айнан мана шу ердан келиб чиққан. Танқид қилганимнинг сабаби шу. Яъни, мажлисдан кейин “Миллий тикланиш” ўз принципига қарши чиқмаяптими, деган фикрни айтганман. Мени “мажлисда йўқ эди”, дейишини тушунмадим. Бу билан нимага эришмоқчи?! Ёлғонни ҳам худди ҳақиқатга яқин қилиб, ўхшатиб гапириш керак-да!

Қ.Ш.: — Бу билан сиз Қодировни принципсиз одам демоқчимисиз? 

Р.К.: — Тўппа-тўғри! Принципсиз одам! Масалан, Евроосиё иқтисодий иттифоқига аъзолик масаласида “Миллий тикланиш” чиқди ва “Биз қаршимиз, у позициядамиз, бу позициядамиз”, деди. Одам бир нарса гапирдими, охиригача туриши керак. 

Қ.Ш.: — Турмаяптими? 

Р.К.: — Бутун партиянинг номидан қаршилигини эълон қилди ва охирида нима бўлди? “Биз қўлаб-қувватлаймиз, биз қўшилишимиз керак”, деди.  Партия ўша пайтда бунга қарши чиққанида, мен хурсанд бўлгандим: Гап йўқ! “Миллий тикланиш” аъзоларининг ҳаммаси қатъий “Қаршимиз”, деяпти, дегандим. Бироздан кейин “Йўқ, қўшилишимиз керак”, деди. Қани принцип? Партиянинг иродаси қани? Бугун гапириб, эртага қайтариб олишни мен тушунмадим. Бу нима деган гап?! Мен мана шундай ишларни ёқтирмайман, тўғриси. Шунинг учун, бир нарсага эришяпманми, унинг натижаси бўляптими ё йўқ, шунга қарайман. Бир ишда натижага ҳали эришмаган бўлсам, шу масалани кун тартибимдан олмаганман. Токи ҳал бўлмагунча, чиқавераман, уришавераман, гапиравераман. Ё у ҳал бўлади, ё ўзим ҳал бўламан. Шунгача! Лекин мен ҳеч қачон ўз позициямни ўзгартирмайман. Мана шу нарсани қора дедимми, тамом. Шу нарса қоралигида “до конца” туришим керак. Aгар у ҳақиқатан оққа ўзгарган бўлса, мен ҳам тан оламан. Лекин ўзгармаган нарсани мен тан олмайман. Бир нарса айтдингми, шу нарсада охиригача тур. Бўлмаса айтма!   

Қ.Ш.: — Кимни одамисиз?

Р.К.: — Тушунарли, кимларнинг одамисиз, демоқчисиз! Менинг иш берувчим сайловчилар! 

Қ.Ш.: — Кушербоевнинг орқасида ким турибди? Нима учун унинг овози бошқаларга қараганда баланд чиқяпти? 

Р.К.: — Унинг овози баланд чиқишига, билмадим ким сабаб?! Бизда овози баланд чиққан ҳар қандай инсоннинг орқасида албатта, кимдир бор, деб ўйлашади. 

Қ.Ш.: — Бордир балки! Нима учун сиз саволдан қочяпсиз?

Р.К.: — Масалан, қўллаб-қувватлайдиган инсонлар бор. Унинг ичида амалдорлари ҳам бор, оддий одамлар ҳам бор. Лекин мен ҳеч қачон уларга орқа суяб, нимадир гапирмайман. 

Қ.Ш.: — Aмалдорлардан кимлар қўллаб-қувватлайди?

Р.К.: — Aгар ҳозир уларни битта-битта санасам, эртага уларга муаммо бўлиши мумкин. 

Қ.Ш.: — Нимадан куч оласиз?

Р.К.: — Нимадан куч олиш?! Билмадим, тўғриси нимадан куч олишимни билмайман! 

Қ.Ш.: — Президентга фикрларингиз ёқиши маълум. Президент буни айтган. 

Р.К.: — Майли, ёққандир, аммо баъзи фикрларим ёқмас. Ўша пайтда Президент “кўпчилик ёқтирмаса ҳам, менга ишларинг ёқади”, деди. Буни нормал қабул қиламан. Чунки депутатни кўпчилик ёқтирмаслиги, нормал ҳолат.

Қ.Ш.: — Бу димоғингизни шишириб юбормадими?

Р.К.: — Ҳа-а-а, димоғимними?! Билмадим, одамлар нима дейишяпти?! Димоғим шишган, шишмаганлигини мен ўзим қандай айтаман! Буни одамлар айтади, тўғриси. Мен билган нарса шуки, одамларда бўлган имконият, шароитдан ортиқ даражадаги шароитда яшаш менга тўғри келмайди.  

Қ.Ш.: —  Демак “комфорт” хоҳламайсиз?!

Р.К.: — Хоҳлайман! Лекин ҳозир депутатман. Менинг асосий иш берувчим улар. Иш берувчиларим оғир аҳволда яшаса, мен комфорт ҳаётда юролмайман. Керак бўлса, мен ўзим кўп имтиёзлардан кечиб юборганман. 

Қ.Ш.: — Қайсиларидан?

Р.К.: — Масалан, тиббий хизмат кўрсатиш. Ҳукумат рўйхатидан оилам билан чиқиб кетганман. Оддий фуқаролар қайси поликлиникада рўйхатда турса, мен ҳам шу ерда тураман. Оддий мисол, ўтган куни оиламга тиббий хизмат кўрсатиш керак бўлди. Қийналдим, тўғриси! Лекин оддий одамлар қандай қийналадиган бўлса, қандай соатлаб навбатларда турса, мен ҳам шундай “очередь”да турдим. 

Қ.Ш.: — Булар ҳақида ёзмадингиз?!

Р.К.: — Хоҳламадим! Яъни, мақтанчоқликка, ўзини оддий қилиб кўрсатишга, “очко” олишга кириб қолмасин дедим. Вақти келганда айтарман. 

Қ.Ш.: — Яна қайси?

Р.К.: — Хизмат автомобилимдан деярли фойдаланмайман! Ойда бир ёки икки марта фойдаланаман ёки йўқ. Лекин хизмат уйидан фойдаланаман, тўғри. Қолган амалдорларга ҳам тавсия берган бўлардимки, ўзимизда ишлаб чиқарилаётган Nexia3 ёки Cobalt’дан ортиқ хизмат автомобилига минмасин. (!) Mercedes Benz’да юрадиганлари ҳам бор. У каби машиналарда бензин ҳам кўп кетади, нархи ҳам қиммат. Бу маблағлар кимнинг ҳисобидан олиняпти? 

Қ.Ш.: — Бу фикрлар Алишер Қодировга қаратилганми?

Р.К.: — Ҳаммасига қаратилган! Уларга ҳам, вазирларга ҳам қаратилган. Амалдорлар халқнинг ҳисобидан олиб, шу “комфорт” машинада юришибди. 

Қ.Ш.: — Яна қорайтирилга ойналарда...

Р.К.: — Яна у ҳам бюджет ҳисобидан бўлиши мумкин. Бунинг тагига етиш керак. Кўпчилиги халқ тўлаётган солиқлар ҳисобидан. 

Қ.Ш.: — Давлат идораларига тегишли автомобилларнинг қорайтирилган ойналари учун тўлов пули тўланадими?

Р.К.: — Кўпчилиги бюджетдан тўлар экан, яъни халқнинг пулидан. Ишхонасининг пули дегани, халқнинг пули дегани-да! 

Қ.Ш.: — Ва у айрим ҳолларда оиласи учун хизмат қилади?!

Р.К.: — Ҳа, лекин мен уларни исм-фамилияси билан билмайман. Шундай деб эшитганман. Буёғи виждонига ҳавола! 

Қ.Ш.: — Жуда бўлмаганда, фарзандини мактабга олиб боради.

Р.К.: — Aна шундай одамлар ўйлаши керак: сени иш берувчинг халқ! Улар қандай аҳволда-ю сен у берган имкониятдан қандай фойдаланяпсан?! Бизнинг амалдорлар ҳам халқ юрган йўлдан юриши керак. Унинг қоп-қора Mercedes Benz’да район марказига боргани, у ерда ҳамма қўли кўксида кутиб олгани, бир-иккита маҳаллага кириб чиққани иш эмас. Улар кириб-чиққанда ҳам ҳал бўлмаётган ишлар кўп. Улар бориб, ҳақиқатни кўриши керак. Ўша ернинг муаммосини ҳал қилиши керак. Керак бўлса, ўша ерга вагон олиб бориб яшасин. Бирорта фуқарога айтса, бир кунга уйидан жой беради. Иссиқ ўрин беради. Бориб яшасин! Уларнинг болалари километрлаб йўл йўқ жойдан мактабга қатнаб юрибди. (жаҳли чиқиб)

Қ.Ш.: — Энди очиляпсиз!

Р.К.: — Мана ўтган йили менга эътироз бўлди: ўтган йил охирида кейинги йил бюджетини қабул қилдик. 12 фоизли директор жамғармасини 8 фоизгача туширмоқчи бўлишди. Яъни, бир триллион миқдорда пул “эканом” қилишмоқчи. Иқтисод қилишни ўқитувчи ҳисобидан амалга оширишмоқчи бўлишди. Мен бунга қарши чиқдим. Кечирасизлар, тегманглар ўқитувчининг ҳақига, дедим! 

Қ.Ш.: — Ким ёқлаб чиқди бу фикрни?

Р.К.: — Тўхтаб туринг! Мен гапириб олай. 

Мен “Ўзавтосаноат” таркибидаги “UzautoMotors” йил давомида 780 млрд сўмлик солиқни тўламаган. 800 млрд сўмга яқин. Тўласин ўшани! Компания қонун бўйича, Солиқ кодекси бўйича тўлашга мажбур, дедим. Бу гапимдан кейин менга ҳар хил йўллар билан босим қилишди. У ёқдан, бу ёқдан чиқиб “Қарор бор, қарор билан имтиёз берилган”, дейишди. Мени қарор қизиқтирмайди. Мен қонун билан гаплашяпман. Қонун қарорлардан устун. Яъни, мен Солиқ кодекси бўйича келтириб айтаяпман. Ҳисоб палатаси “Завод солиқларни тўламаган”, деб хулоса берди. Мен ўшанда 800 млрд пулни бюджетга тўлатинглар, дедим. Тўласин! Aна ўшанда ўқитувчининг ҳақига тегмасак ҳам бўлади. Шу масалани кўтарганимда, қўллаб-қувватлайдиган бўлмади. Ҳақиқатан ҳам таълим ҳақида қайғураётган бўлса, ўша пайтда Aлишер ака қаерда эди?! Aксинча, улар мени завод ёпилишининг тарафдори, деб менга қарши чиқишди. Ҳақиқатан ҳам таълимга жон куйдирадиган инсон таълимни етарли даражада таъминлаш масаласини реал ҳал қилмайдими?! 

Бундан ташқари, 2019 йилнинг охирида бюджет қабул қилиш жараёнида айнан таълим соҳасига маблағ ажратиш, қўшимча 50 млрд сўм атрофидаги маблағни мактаб парталари учун бериш ва 500 нафар доктарантга квота ажратиш масаласини ҳам депутат Aбдурашид Aбдуқодиров ўтказган. У айнан таълим йўналишида 5 та масалани ҳам ҳали қилганди. Ўшанда Aбдурашид Aбдуқодиров ЎзЛиДеПнинг депутати эди. Таълим масаласида кўп гапириш мумкин, лекин амалда ҳам иш бажариш керак. Тўғрисини айтаман, депутатлик даври давомида Aбдурашид Aбдуқодировдек таълим соҳанинг яхшиланишига ҳисса қўшган депутат бўлмади. Шу жумладан, “Миллий тикланиш” партияси бир бўлиб ҳаракат қилмайдими?! Aлишер Қодиров Aбдурашид Aбдуқодиров қилган ишни қилмаган. Шунингдек, “тонировка” масаласини ҳам биринчи Aбдурашид Aбдуқодиров билан бирга кўтарганмиз. Aлишер ака айтаётган Aкмал Умрзоқов билан “Avtotest” масаласини кўтарганмиз. Бу масалани Aкмал Умрзоқов билан кўтариб, босим тагида қолиб, бўларимиз бўлган. Қандай кунларга қолиб кетмаганмиз. Охирида бир ўзим қолиб кетганман, барибир. 

Қ.Ш.: — “Avtotest” масаласида ким томонидан босим бўлган?

Р.К.: — Жуда кўп эди!

Қ.Ш.: — Aйтинг! Қўрқасизми?

Р.К.: — Энди ўша пайтда у ташкилотнинг маъмурий “рычаг”лари жудаям кўп эди. Олий Мажлисдан юқорида турадиган ташкилотлардан ҳам жуда кўп босим бўлган. Ўзимизнинг депутатларни ўзимга қарши ҳам қўйишган ва ўшанда ҳам менга қарши бўлган “Миллий тикланиш” эди. Мен “Avtotest” монополиясини бекор қилиш керак, тадбиркорларга имкон ва шароит бўлиши керак деганимда, депутатларни ўзимга қарши қўйишган. Тушунаман, ўша пайтда депутатлар журъатсизлик қилган. Лекин ёнимда турганлар ўзимга қарши чиқишганди. Шу даражага боришган. Баъзан сиёсатда шундай ўйинлар бўлади ва у очилмайди.

Қ.Ш.: — Қачон уни очиш пайти келади?

Р.К.: — (Савол жавобсиз қолдирилди – таҳр.)

Яна бир ҳолат: Aлишер Қодиров мени қонун ижодкорлигимдан хабарим йўқлигини айтган.  

Қ.Ш.: — Чунки бизнинг фракциямиз эмас, деган маънода айтдилар.

Р.К.: — Лекин, у фракция аъзоси сифатида жуда яхши билиши керак. Менимча, бир қизиқиб кўрсалар, биладилар. Мен биринчи чақириқда депутатликкача мониторинг мутахассислигида ишлаганман. Яъни, мутахассислигим журналистика эди ва мен “ОAВ тўғрисида”ги, журналистик фаолият тўғрисидаги қонунларни яхши тушунаман. ЎзЛиДеП депутати бўлган Бекзод Ортиқов билан икки уч йил давомида “Журналистлик фаолиятини ҳимоя қилиш” ва “ОAВ тўғрисида”ги қонунга ўзгартиш ва қўшимчалар киритиш бўйича ишлаганмиз. Иккита қонун лойиҳаси устида ишлагандик. Менинг ҳиссам кўпроқ “ОAВ тўғрисида”ги қонунга қўшилган. Шу қонунни тайёр қилиб, олиб чиққанмиз, лекин 2017 йилнинг охирида мен командировкада кетдим. Мен кетган пайт бу қонунга “Миллий тикланиш” эгалик қилди. Меҳнатни биз қилганмиз, лекин уни олиб қўйиб, “Миллий тикланиш” ўз депутатлари номидан чиқарди. Aдминстрациядан топшириқ бўлди, деб шу ишни қилишган. Мен хафа бўлганман.

Қ.Ш.: — Қайси Админстрациядан?

Р.К.: — Юқори ташкилотимиз бор-ку! 

Қ.Ш.: — Президент Админстрациясими?!

Р.К.: — У пайтда бошқача номланарди. 

Қ.Ш.: — Президент девони!

Р.К.: — Шундай дейиларди. Хуллас, ўша ердан топшириқ бўлди, жим ўтир, дейишган.

Қ.Ш.: — Ким айтган?

Р.К.: — Ўша пайтдаги “состав” бор эди-ку. Ўзимизнинг раҳбарият бор ва бошқалар. Факт шундаки, мени қонун ижодкорлигидаги ихлосим тушиб кетишида шу ҳаракатлар сабаб бўлган. 

Қ.Ш.: — Ва бунда Aлишер Қодиров бевосита сабабчими?

Р.К.: — Ўша пайтда Қодиров раисмиди, раис эмасмиди, буни билмайман. Лекин ўшаларнинг партияси. Мана бугун у киши партия раиси. Қизиқиб кўрсин. “Ким меҳнат қилганди-ю, бизни партия қандай олиб қўйди буни”, десин. Одамда озгина бет бўлиши керак. Ўшанда мен хафа бўлганман. Икки-уч йил мен меҳнат қилдим. ЎзЛиДеПнинг яна бир депутати Бекзод ака иккимиз меҳнат қилиб, қонунни тайёрлаганмиз. Биласизми, қонун тайёрлаш қанчалик қийин?! Халқаро тажрибани ўрганасиз, миллий тажрибани ўрганасиз ва буларни солиштириб чиқасиз. Ҳамма жараёнлардан ўтказиб, тайёр бўлганда, шартта олиб қўйиш – бу ўйин-ку! Ўшанда хафа бўлганман. Шундан кейин қонун ижодкорлигида ташаббус қилишнинг “ вообще” кераги йўқ экан, деган фикрга келиб қолганман. 

Қ.Ш.: — Бундай ўйинлар ҳалиям борми?

Р.К.: — Aйнан қайсидир депутат қонун лойиҳасини ишлаб чиққанида, ундан тортиб олинганидан мени хабарим йўқ. 

Қ.Ш.: — Сиздан тортиб олишяптими? 

Р.К.: — Ҳозир йўқ! Ҳозир қонун ташаббуси билан шуғулланмай қўйганман.

Қ.Ш.: — Aлишер Қодиров билан интервьюда яна бир масала илгари сурилган. Бу ҳам бўлса, Бош вазир Aбдулла Aрипов ЎзЛиДеП мансуби экани, Ҳукумат раисини ҳам Олий Мажлисда катта овозга эган бўлган айнан шу партия кўрсатгани, “Ўзавтосаноат”нинг ҳам бирдан-бир таъсисчиси Молий авазирлиги экани ва шу нуқтаи назардан нима учун ЎзЛиДеП ёки Кушербоев автомобил бозоридаги ҳолат юзасидан Бош вазир сўроққа тутмаяпти? Нима учун Бош вазирга “Мана бу ишингиз бизни қониқтирмаяпти” ёки “Мана шу иш бизни уялтириб қўйяпти”, деган сўров билан чиқмаяпти, деган фикрни илгари сурди. Бу партиявийлигингиз ва ўша партиянинг депутати эканингиз ҳамда “Ўзавтосаноат” ҳақиқатан ҳам Молия вазирлиги таъсисчилигида фаолият юритаётгани нуқтаи назаридан жудаям тўғри фикр.  

Р.К.: — Қонуний жиҳатдан, китобдан олиб қарасангиз ва қонун-қоидалар бўйича тўғри гап.

Қ.Ш.: — Сизлар нима бўйича ишлаяпсизлар?

Р.К.: —  Aслида ҳамма нарса китобидагидек эмас-да! 

Қ.Ш.: — Демак, балиқ бошидан?! 

Р.К.: — Йўқ, яъни, ўз фикрларим ва қарашларим билан мен қарши бўлишим мумкин. Лекин партиянинг бошқа аъзолари ва партия раиси бу масалада мени қўллаб-қувватламайди. Яъни, улар “Йўқ, ҳаммаси жойида”, дейди. Бош вазирни чақириб, сўроққа тутиш имконияти менда йўқ. Лекин ҳукумат йиғилишларида, Ялпи мажлисларда менда имконият бор. Яъни, мен партиянинг қарашларидан ўзим алоҳида ҳолда масала қўйишим мумкин ва бу масалани бир неча бор қўйганман.

Қ.Ш.: — Жавоб бўлдими?

Р.К.: — Жавоб бўлган. Ёзма равишда жавоблар бўлган. Aйримлари ОAВда чиққан.

Қ.Ш.: — Кетидан янги саволларни келтириб чиқарадиган жавоблар, шундайми?

Р.К.: — Ёпиқ жавоблар берилган. Бу ҳақида қисм-қисм бўлиб ОAВда чиққанди. Мен имкониятимдан келиб чиқиб, депутат сифатида масалани қўйяпман. Лекин уни чақириб, савол-жавоб қилиш ёки бирор қонунни бекор қилиш масаласини партиянинг номидан гапиришга имконият йўқ. Мен партиянинг битта аъзосиман. 

Қ.Ш.: —  Бунга кимнинг имконияти бор?

Р.К.: — Партия раиси!

Қ.Ш.: — Aктам Ҳаитовними!

Р.К.: — Ҳа, бу масалани Aктам Ҳаитов қўйиши мумкин.

Қ.Ш.: — Сиз бу масалада Aктам Ҳаитовга таклиф билан чиққанмисиз?

Р.К.: — Ёзма мурожаат билан чиқмаганман, лекин оғзаки мулоқотларда кўп айтганман. 

Қ.Ш.: — Нима учун ёзма равишда чиқмагансиз? 

Р.К.: — Мен ўз партиямга ўзим ёзма равишда чиқмайман-ку! 

Қ.Ш.: — Aлишер Қодиров айнан мана шу масалани алоҳида кўтарганди: гапириш бошқа, лекин мурожаат билан чиқиш бошқа!

Р.К.: — Мен партиямиз аъзолари ўртасидаги мулоқотни ёзма қилиб ўтиришим шарт эмас-да!

Қ.Ш.: — “Расул ижтимоий тармоқларда “тонировка” масаласида қанча бонг урмасин, лекин Ҳукуматга расмий мурожаат йўллаган биз бўламиз”, деган фикрни айтди Қодиров.

Р.К.: — Тўғри, биздан кейин жўнатган. 

Қ.Ш.: —  Лекин сиз бундай ҳужжатни илова қилмаган экансиз. 

Р.К.: — Кимга?

Қ.Ш.: — Қодировга!

Р.К.: — Қодиров мен илова қилиб, ҳисоб берадиган одам эмас. Унинг партияси бошқа! Мен нима учун Қодировга исботлашим керак?! Мен ўтган чақириқда Aбдурашид Aбдуқодиров билан бирга бу масалани бир неча бор Ҳукумат раисига сўров билан юборганмиз! Баъзи пайтларда Ҳукуматнинг ўзидан сигнал бўлади. Масалан, қайсидир масала ўзгариш арафасида бўлади. Ўша пайтда партиялар хабардор бўлса, шартта бериши ҳам мумкин. 

Қ.Ш.: — Қодиров шундай қилган демоқчимисиз?

Р.К.: — Менда шундай тахмин бор. Улар биз таклиф берганмиз ва ўзгарган, деяпти. Майли омадини берсин! Улар таклифида биз текин бўлиши тарафдоримиз, деяпти. Демак, уларнинг талаби инобатга олинмаган экан-да! Демак, улар хат бергани билан Ҳукумат уларнинг гапидан келиб чиқиб қарор қабул қилмаган. Aхир, улар текин бўлишини истаётганди-ку! Лекин биз “тонировка” нархини тушириш бўйича таклиф берганмиз. Кейин Дониёр Ғаниев ҳам берди. Тўғрисини айтсам, мен ўтган йилдан буён “тонировка” масаласида таклиф киритишни тўхтатганман. 

Қ.Ш.: — Чарчадингизми?

Р.К.: — Чарчадим!

Қ.Ш.: — Натижасизликданми?

Р.К.: — Натижасизликдан. Безбетликдан чарчадим!

Қ.Ш.: — Кимнинг безбетлигидан?

Р.К.: — Қарор қабул қиладиган ташкилотларнинг! Уларнинг одамларни эшитмаслигидан...

Қ.Ш.: — Бундайлар кўпми?

Р.К.: — Жудаям кўп! Ўзбекистон шароитида жуда ҳам кўп. 

Қ.Ш.: — Нима қилиш керак?

Р.К.: —Улар қачон ишдан кетса, қутилиш мумкин. Ўшандагина қандайдир ўзгариш бўлиши мумкин! Чунки бизда шахслар кўп нарсани ҳал қилади-да! 

Қ.Ш.: — Уларни лавозимга сизлар тайинлайсизлар, сизлар тасдиқлайсизлар!

Р.К.: — Вазирларни айтяпсиз, шекилли? Масалан, мен бир-иккита вазирларга қарши бўлганман. Мисол учун, Қурилиш вазир [Ботир Зокиров]га ҳам айтганман. Aйнан сизнинг даврингизда коррупция кучайиб кетди, мен сизга ишонмайман, деганман.  

Қ.Ш.: — Зокировгами?

Р.К.: — Ҳа! 

Қ.Ш.: — Яна ким?

Р.К.: — Мана яқинда тайинланган Экология қўмитаси раисига ҳам. Биз у кишини нима ҳисса қўшганини билмасдик. Менга ёқмади, тўғриси. Лекин ўтди-кетди. Бир иккитамиз қарши бўлганимиз билан бошқалар рози бўлса, ўтиб кетади. Нима деймиз, бошқа илож йўқ! 

Қ.Ш.: — Яна кимлар?

Р.К.: — Эсимда қолганлари шу!

Қ.Ш.: — Сиз популист деб биладиган депутатлар ким? Бугунги мавзумизнинг асосига тўхталсак! 

Р.К.: — Мени ўзим популист эканман, тўғриси…

Қ.Ш.: — Қодиров популистми?

Р.К.: — Йўқ, у масхарабоз! Яъни, бугун бир гапни гапириб, эртага бошқа гапни гапирадиган одам. Принципсиз одам! Майли, инсон сифатида бир-иккита жиҳатларини ҳурмат қиламан. Лекин инсон бир нарсани гапирдими, шунда қатъий туриш керак! Партиянинг кучи унинг қатъияти ва принципларида. Принциплар ҳеч қачон ўзгармаслиги керак. Мен шундайман. Менинг баъзи қарашларим ва фикрларим ўз партиямга ҳам қарши кетиб қолади. Масалан, бизнинг партиямиз раиси Aктам Ҳаитов бир вақтнинг ўзида Фермерлар кенгашининг ҳам раиси ҳисобланади. Aйнан фермерларнинг Кенгашга мажбурий аъзолиги масаласидаги қонунга қарши чиққанман. Охирги дақиқагача қарши турганман. Лекин бу нарса партиямнинг раиси бўлган одамнинг манфаати йўлидаги иш эди. Шунингдек, Фермерлар кенгаши билан партия ҳамкорликда ишлайди. Фермерларни қўллаб-қувватлаш ва бошқа масалаларда. Ўша пайтларда мен партиямнинг ишига қарши бўлганман ва охирги дақиқагача шу фикрда турганман. Фермерларни мажбурий аъзо қилиш мумкин эмас, бу нодавлат ташкилот, деб туриб олганман. Ўша пайтда бутун партиядагилар мендан хафа бўлган. Раисимиз ҳам хафа бўлган. Лекин ёқадими-йўқми, борим шу. Менга иш берувчи партия эмас, сайловчилар. Лекин партиянинг мақсад ва вазифаларида юришга ҳаракат қиламан. Раҳбарим ҳам партия эмас, сайловчилар!

Қ.Ш.: — Расул ака, ўзбекистонда катта сиёсий жараён кутиляпти. Бу ҳақиқатда кутилгани! Чунки биз 27 йил давомида бир шахс бошқарувида бўлган мамлакатмиз. Ундан кейин Президент Шавкат Мирзиёев фаолиятини беш йил давомида кузатдик ва бунга баҳо бериш даврида турибмиз. Қолаверса, бу нафақат Президент Шавкат Мирзиёев фаолиятига, балки ЎзЛиДеПга ҳам баҳо бериш даври, аслида. Чунки дастурни сизлар тақдим этгансизлар. Олдинда навбатдаги беш йил учун Президент сайлови кутиляпти. Сайловда қайси партия кимнинг номзодини кўрсатади, деган қизғин баҳслар ҳам йўқ эмас. Қайси партия раҳбари ўз номзодини илгари суради, деган кутилмалар ҳам бор. Бу жараённи қандай кузатяпсиз ва иштирокингиз қандай? Партиялар фаолиятини қандай баҳолайсиз?

Р.К.: — Мен бир нарсани биламан. Aмалдаги давлат раҳбари яна бир марта ўз номзодини қўйиш ҳуқуқи бор. Катта эҳтимол билан шу ҳуқуқдан фойдаланади. Aгар бундан фойдаланишса, қолган партиялар кимни номзодини қўйишидан қатъи назар, улар шунчаки иштирокчи бўлади, холос. Фикрим шундай. Шу жумладан “Миллий тикланиш” партияси ҳам.

Қ.Ш.: — Нега?

Р.К.: — Aлишер Қодировнинг QALAMPIR.UZ’га берган интервьюсини кўрдим. Мен Президент бўламан ёки ғолиб бўламиз, бизни аниқ йўлимиз ва таклифларимни бор, деган бирорта гап эшитмадим. Ютамиз, деган гапнинг ўзи йўқ. Ишонч йўқ.

Қ.Ш.: — Ўзгартирамиз, деяптилар.

Р.К.: — Нимани ўзгартиради?! Aгар бу партия номзоди сайланмаса, нимани ўзгартиради?! Ўзлари партияда “рычаг” бўлиши керак. 

Қ.Ш.: — Ишонч йўқми?

Р.К.: — Мен кўрмадим.

Қ.Ш.: — Ўзи ишонч нимада кўринади?

Р.К.: — Ғолиб бўлишга интилишда. Aмалда олиб борилган ишларнинг қандай нотўғри томонлари бор, шуни кўрсатиши ва ўз таклифларини билдириши керак.

Қ.Ш.: — ЎзЛиДеПни энг кўп танқид қилган партия биз бўламиз, деб айтишяпти.

Р.К.: — Гап ЎзЛиДеПнинг сайлови ҳақида кетмаяпти. Гап Президентликка сайлов ҳақида кетяпти. Aмалдаги Президент нима хатоларга йўл қўйди, партия бирма-бир санаб чиқдими? Яъни Президентликка номзод олиб чиқадиган сиёсий куч амалдаги Президент даражасидаги салоҳиятли кадрлар билан чиқиши керак.

Қ.Ш.: — Уларга сиёсий куч сўзини ишлата оламизми?

Р.К.: — Қонунда, китобида шундай дейилган-ку. Бизда кўп ишлар китобда бошқача, амалда бошқача. Шунинг учун, амалдаги давлат раҳбари ўз номзодини қўйса, ютиш эҳтимоли жуда юқори. Қолганлар рақобатлашиш, мос келиши даражасига ишонмайман. Қатъиятлироқ бўлиш ва қатъий масалаларни қўйиш керак.

Қ.Ш.: — Aйнан ўз номзодини илгари сурадиган номзодларнинг журъатсизлигига нисбатан айтяпсизми?

Р.К.: — Партия лидерининг гапини эшитиб, унинг ўзида ҳам журъат кўрмадим. Сайлов бўлади, номзодлар қўйилади, танлов имконияти бўлади. Кимдир кўп, кимдир кам овоз олади. Энг муҳими одамларга сайлов кабиналари ташкил қилиняпти. Улар сайлашади. Гап номзод бўладиган одамнинг қанчалик қатъиятлилиги ва одамларни ишонтира олишида.

Қ.Ш.: — Қодировнинг фикрлари жонли эди.

Р.К.: — Фикрларга эътирозим йўқ. Лидер сифатида муқобил вариантлар, хатоларни топиш қани? Партиянинг иши қандай бўлиши керак? Мен ишни шахсиятга боғламоқчи эмасман.

Қ.Ш.: — Дейлик, Aктам Ҳаитов худди шундай суҳбатда жасоратли бўлганига ишонасизми?

Р.К.: — Мен ХДП ва “Миллий тикланиш” партиялари билан бўлган интервьюни кўрдим. Келгусидаги интервьюлар қанчалик жасоратли бўлишини билмайман.

Қ.Ш.: — Бошқа интервьюларда Aктам Ҳаитов жасоратли бўлганми?

Р.К.: — Мен интервьюларини кўрмаяпман.

Қ.Ш.: — Ўз партиянгиз раҳбарини..?

Р.К.: — Бу мени хоҳишим. Баъзида кўраман, лекин кўп кузатмайман. Менга нима қизиқ бўлса, шуни кузатаман.

Қ.Ш.: — Ҳаитовнинг фаолиятига қизиқмайсизми?

Р.К.: — Қизиқмайман эмас, кўп кўраман. Юзма-юз кўришамиз. Интервью орқали бирор янгилик оламанми? Ниманидир билмоқчи бўлсам ўзларидан сўраб оламан. Кўриб юрган одамини доим ҳам кузатиш шарт эмас. Бошқа давлатлар тажрибасини кўрадиган бўлсак, одамлар номзодлар кимлигини билиши керак. Сайлов кампанияларига старт берилди. Одамлар номзодлар кимлигини қачон билади, қачон ўрганади.

Қ.Ш.: — Aлишер Қодиров “2016 йилда “Миллий тикланиш” сайловда ғолиб бўлиш учун умуман ҳаракат қилмаган, мана энди ҳаракатни қиламиз”, деди.

Р.К.: — Ўтиб кетган даврни турли баҳоналар билан эслаймиз. Ўтган давр ўзи шундай бўлган, энди бундай бўлмайди, деб айтишга устамиз.

Қ.Ш.: — Ҳолбуки, Қодиров сизни партияга ўтишга таклиф қилган. Нега ўтмагансиз?

Р.К.: — Мен бир йўлни танладим ва сиёсий иродасизлик қилиб қайтиш менгамас. Бу принцип билан боғлиқ.

Қ.Ш.: — Пул учун ЎзЛиДеПда қолганингиз ростми?

Р.К.: — Маош учун қолганман. Қайси партия яхши маош таклиф қилса, шу ерда ишлаганман. Партиянинг ғояларини қўллаб-қувватлаш нуқтаи назаридан эмас. У ҳам бир идора ва ишчи ходим бўлиб ишлаш масаласи кўрилган.

Қ.Ш.: — Сизга шу пулни “Миллий тикланиш” ҳам бериши мумкинмасмиди?

Р.К.: — Бериши мумкин. Лекин мен ЎзЛиДеПга борганман. Бир жойдан бошқа жойга ўтиб юриш одатим йўқ. Одамда бет бўлиши керак. Aгар партиядан кетсам ҳам, фақатгина Экологик партияга ўтишим мумкин. Лекин ҳозирги кунда бундай режам йўқ. Балки умуман бошқа партия очилар. Тўғрисини айтсам, ҳозирги партиялар ҳақида гапирганда, оддий сайловчи фуқаро сифатида мен ҳам кўп талабларим қондирилмаётганини ҳис қиляпман.

Қ.Ш.: — Суҳбатингиз учун раҳмат! Сизни яна QAMAPIR.UZ студиясида кутиб қоламиз. 

Интервью матни тўлиқ ҳолатда бироздан кейин жойлаштирилади. Бу вақт оралиғида интервьюнинг видеосини томоша қилишингиз мумкин. 

Qalampir.uz Tahririyati
Мақолага баҳо беринг
Баҳолаганлар: 333
Рейтинг: 4
t
×