Туркиянинг Эрдўғандан олдинги президенти ими-жимида Ўзбекистонга келиб кетди

Туркиянинг 11-президенти Абдулла Гул ўтган ҳафтада рафиқаси билан Ўзбекистонга сафар қилди. Бу ҳақда у ўзининг Facebook'даги саҳифасида ёзиб қолдирди.

Собиқ президент ўз ижтимоий тармоқларида Тошкент, Самарқанд, Бухоро ва Хивага илк бор ташриф буюрганини айтиб, бу шаҳарларда гувоҳ бўлган тараққиёт ва жонланишдан мамнунлигини ифода этган. У сафар таассуротлари ҳамда бу шаҳарларнинг турк-ислом цивилизацияси тарихидаги ўрни ҳақида алоҳида фикр билдирган.

Гулнинг ёзишича, Ўзбекистонда кузатилаётган тараққиёт эътирофга лойиқ.

“Турк-ислом тарихининг гувоҳи бўлган Тошкент, Самарқанд, Бухоро ва Хивага биринчи марта ташриф буюрмоқдаман. Ўзбекистонда кўрган ўзгаришлар, жонланиш ва тараққиёт мени қойил қолдирди ва мен бунга улкан баҳо бераман”, дея ёзиб қолдирган собиқ президент.

Гулнинг ижтимоий тармоқ саҳифасида жойлаштирилган суратларда у рафиқаси Ҳайринисо Гул билан тарихий жойларда юрганини кўриш мумкин. Самарқанддаги Регистон майдони, Бухородаги тарихий обидалар ва Хиванинг меъморий ёдгорликлари фонида олинган суратлар кўзга ташланади.

Туркиянинг бир қанча ОАВларига кўра, Гул президентлик лавозимини тарк этганидан кейин на экранларда, на ижтимоий тармоқларда фаол кўринмаган ва бу қайтиш бўлган.

Маълумот учун, Абдулла Гул 1950 йил 29 октябрда Туркиянинг Кайсери шаҳрида туғилган. Бошланғич, ўрта таълимни Кайсерида олган. Кейинчалик олий таълим олиш учун Истанбулга кўчиб, Истанбул университетининг Иқтисодиёт факультетини тамомлаган. Абдулла Гул 2007 йил 28 августда Туркиянинг 11-президенти сифатида сайланган ва 2014 йилгача бу лавозимда фаолият юритган. У “Адолат ва тараққиёт” партиясининг асосчиларидан бири бўлиб, президентликка келишидан аввал ташқи ишлар вазири ҳамда қисқа муддатга бош вазир лавозимларида ишлаган. 
Абдулла Гул давлат раҳбари бўлган пайтда Ўзбекистонга умуман келмаган ва Ўзбекистоннинг Биринчи Президенти Ислом Каримов ҳам унинг даврида Туркияга бормаган.