Туркияга ҳам қум бўрони ёпирилди 

Бугун, 3 апрель куни Туркиянинг Шарқий Ўрта Ер денгизи ҳудудидаги айрим шаҳарларини Африкадан кириб келган чанг тўзони қоплашни бошлади. Бу ҳақда GZT хабар берди.

Қайд этилишича, кучли шамол таъсирида кириб келган чанг Адана, Ҳатай ва Усмония ҳудудларида кўриш масофасини пасайтирган. Қалин чанг транспорт ҳаракати ва кундалик ҳаётда жиддий қийинчиликларни келтириб чиқарган. Айниқса, Ҳатай вилоятининг Самантоғ туманида кучли сезилган. Зич чанг тўзони сабаб йўл ва денгиздаги кўриниш баъзи пайтларда деярли йўқолиб, ҳайдовчилар ҳаракатланиши мураккаблашган.

Бундан ташқари, астма каби сурункали нафас йўллари касалликларига чалинган фуқароларда нафас олиш қийинлашгани ҳам қайд этилган.

Истанбул шаҳрига ҳам кириб келган мазкур чанг сезиларли таъсир кўрсатган. Истанбул техника университети Иқлимшунослик ва метеорология муҳандислиги бўлими ўқитувчиси Ҳусайн Торос ушбу тўзон 5 апрель куни Мармара минтақасини тарк этишини айтган.

Профессорнинг тушунтиришича, Саҳрои Кабирдан кўтарилган чанг булутлари Ўрта Ер денгизи устидаги паст босим тизими таъсирида Туркияга етиб борган. У яна бир муҳим жиҳат – агар ёғингарчилик бўлса, чанг ёмғир билан аралашиб, лой ёмғири деб аталадиган ҳолат юзага келиши мумкинлигидан огоҳлантирган.

Эслатиб ўтамиз, аввалроқ Ғарбий Австралияда кучли бўрон фонида ноодатий табиат ҳодисаси кузатилганди – айрим ҳудудларда осмон тўқ қизил тусга кириб, ҳудудни қалин чанг қоплаганди.

Шунингдек, Грециянинг Крит оролида саҳродан келган кучли қум ва чанг бўрони кузатилган.