Туркияда тутқунликда сақланган ўзбекистонлик аёл қутқарилди
Жамият
−
29 Август 7209
Туркияда эркига хилоф равишда тутқунликда сақланган ўзбекистонлик аёл қутқарилди. Бу ҳақда Ўзбекистоннинг Истанбулдаги Бош консулхонаси хабар берди.
Бош консулхонага Ташқи ишлар вазирлиги орқали Қарши шаҳридан 21 ёшли фуқаро ўз онасининг Истанбулга 4 йил олдин кетгани, 3 йилдан бери алоқага чиқмаётганини айтиб, онасини топиш ва Ўзбекистонга қайтаришда ёрдам сўраган мурожаати келиб тушган.
“Олиб борилган текширишлар натижасида, 1982 йил Қарши шаҳрида туғилган Х.Д. Туркиянинг Ушоқ шаҳрида эканлиги, 2020 йилдан буён Туркия фуқароси М.Г. томонидан эркига хилоф равишда тутқунликда ушлаб турилганлиги аниқланди”, дейилади хабарда.
Жорий йилнинг 27 август куни Бош консулхона, Ташқи меҳнат миграциясининг Истанбул шаҳридаги вакили, “Ўзбек аёллари ҳуқуқларини ҳимоя қилиш” жамияти ва Туркия Ички ишлар вазирлиги билан ҳамкорликда тезкор тадбир ташкил этилган. Натижада, аёлнинг ҳаётига ва соғлигига зиён етказилмаган ҳолда қутқарилиб, Ушоқ шаҳар ички ишлар бошқармасига етказилган.
Туркия қонунчилигига биноан шахсни эркига хилоф равишда тутқунликда сақлаганлиги учун М.Г.га нисбатан жиноят иши қўзғатилган.
“Ҳозирда ватандошимиз Х.Д.ни Ўзбекистонга қайтариш бўйича тегишли ишлар давом эттирилмоқда. Ҳурматли ватандошлар, ёлғон ва пуч ваъдаларга ишониб эркингизни ва ҳаётингизни хавф остига қўймасликни, шу каби вазиятга тушган тақдирда Анқарадаги Ўзбекистон элчихонаси ёки Истанбулдаги Бош консулхонасига мурожаат этишингизни тавсия этамиз”, дейилади хабарда.
Эслатиб ўтамиз, олдинроқ 2024 йил февраль ойидан буён Саудия Арабистонининг Макка шаҳрида қийин аҳволда қолган ўзбекистонлик ортга қайтарилгани хабар қилинганди.
Live
Барчаси
