Туркияда машиналар кўприкдан қулаб тушди. Қурбонлар бор

Туркиянинг Шонлиурфон вилоятида юк машинаси ва бир неча автомобилнинг кўприкдан қулаб тушиши оқибатида уч киши ҳалок бўлди, яна 22 киши жароҳат олди. Бу ҳақда NTV хабар берди.

Телеканалга кўра, ҳодиса кеча, 2 февраль куни маҳаллий вақт билан 21:30 да Бирежик туманида юз берган. Юк машинасининг тормоз тизими ишдан чиққан ва оқибатда у олдинда ҳаракатланаётган автомобилларга бориб урилган ҳамда улар билан бирга Евфрат дарёси устидан ўтувчи кўприкдан қулаб тушган.

Маҳаллий ҳокимиятнинг маълум қилишича, ҳалок бўлган ва жароҳатланганларнинг барчаси Туркия фуқаролари.

Эслатиб ўтамиз, аввалроқ Бразилияда сайёҳларни олиб кетаётган автобус жарликка қулаб тушиши оқибатида 23 йўловчи ҳалок бўлган эди. Автоҳалокат Алагоас штати ҳудудида юз берган. Автобусда 50 га яқин йўловчи бўлган ва улардан бири – ҳомиладор аёл шифохонада вафот этган. Автобус йўловчиларни тоғли ҳудуд орқали Киломбу Палмарис хотира паркидаги тадбирларда иштирок этиш учун олиб кетаётган бўлган.