Туркияда лицейга қуролли ҳужум уюштирилди. Қурбон бор (видео)

Бугун, 14 апрель куни Туркиянинг Шонлиурфа вилояти Сиверек туманида жойлашган лицейда қуролли ҳужум содир бўлди. Бу ҳақда “Sabah” хабар берди. 

Қайд этилишича, воқеа Ҳасан Чалабий маҳалласида жойлашган Аҳмад Коюнжу касб-ҳунар ва техник Анадолу лицейида юз берган. Ҳужум оқибатида 18 киши жароҳатланган. Уларнинг орасида 12 нафар ўқувчи, 2 нафар ўқитувчи ва 2 нафар фуқаро бор. Жабрланганлар шифохоналарга етказилган.

Воқеа жойига тез ёрдам, полиция ва махсус кучлар етиб борган. Баъзи яраланган ўқувчилар ҳужумдан қочиш учун деразадан сакрагани ҳам айтилмоқда. Хавфсизлик кучлари томонидан муассасадаги ўқувчиларнинг катта қисми эвакуация қилинган.

“У 17–18 ёшлар атрофидаги бола эди. Асосий эшикдан кириши билан қўлида узун стволли қурол билан ўқ ота бошлади. Аввал ўнгга-чапга, кейин эса мактаб ичига қарата ўқ узди. Ичкарига кириб, олдидан чиққан ҳар кимга ўқ узди. Кейин ҳамма қичқириб, ҳар томонга қочишни бошлади”, дейди ҳодиса гувоҳлардан бири.

Шонлиурфа вилояти ҳокими Ҳасан Шилдак маълумотига кўра, ҳужум уюштирган шахс ўлик ҳолда топилган.

“Бу шахс лицейнинг собиқ ўқувчиси бўлиб, 9-синфгача ўқиган. Кейинчалик очиқ таълимга ўтган. У воқеа содир бўлганида лицей ичида полиция томонидан ўраб олинган ва у ерда ўз жонига қасд қилган”, дейди вилоят ҳокими.

У мактаб эвакуация қилинганини ва ҳозирда вазият тўлиқ назорат остида эканини билдирган. Шунингдек, ҳоким барча жабрланганларга тезроқ соғайиб кетиш тилагини билдирган ҳамда ҳодисанинг барча тафсилотлари бўйича кенг қамровли тергов олиб борилишини таъкидлаган.

Эслатиб ўтамиз, аввалроқ Истанбул шаҳридаги Борса касб-ҳунар ва техника Анадолу лицейида ўқитувчи Фотима Нур Челик ўз ўқувчиси томонидан пичоқланиб, ўлдирилганди.